Almatyda áriptes qyzdy urdy degen kúdikpen sport sheberi qamaldy
ALMATY.KAZINFORM - Almatyda qurylys dúkenderiniń birinde janjal shyǵyp, arty tóbeleske ulasqan.
Jábirlenýshi qyzdyń aıtýynsha, oǵan áriptesi shabýyl jasaǵan.
Áleýmettik jelide taraǵan vıdeoda qyzdyń kóziniń aınalasy kógergeni kórinedi. Sondaı-aq ol aýrýhanada mıy shaıqalǵany anyqtalǵanyn, kórý qabileti nasharlap, ózin jaısyz sezinip júrgenin aıtty.
Sózinshe, jigit sport sheberi eken.
Qyzdyń sózinshe, bastapqyda polıtsııa onyń aryzyn qabyldaǵysy kelmegen. Keıin eOtinish arqyly ótinish joldaǵanymen, odan soń da eshkim habarlaspaǵan.
Jábirlenýshi oqıǵanyń vıdeosyn bólisti.
Almaty qalalyq polıtsııa departamenti oqıǵa qaladaǵy qurylys dúkenderiniń birinde bolǵanyn málimdedi. Áriptester arasyndaǵy janjal kezinde er adam áıelge kúsh qoldanǵan. Osy derek boıynsha qylmystyq is qozǵaldy.
19 jastaǵy kúdikti ustalyp, ýaqytsha ustaý ızolıatoryna qamaldy.
Tergeý barysynda beınebaqylaý kameralaryndaǵy jazbalar zerttelgen. Onyń nátıjesinde oqıǵanyń qosymsha mán-jaılary anyqtalǵan. Atap aıtqanda, vıdeolarda áıeldiń de áriptesine soqqy jasaǵany tirkelgen. Polıtsııa onyń áreketterine de zań aıasynda baǵa beriletinin habarlady.
Sonymen qatar departament qylmystyq istiń tirkelmegeni jáne sot-medıtsınalyq saraptama taǵaıyndalmaǵany týraly aqparattyń shyndyqqa sáıkes kelmeıtinin aıtty.
- Tergeý jalǵasyp jatyr. Oqıǵanyń barlyq mán-jaıy obektıvti ári jan-jaqty anyqtalady. Zań aldynda bári teń, – dedi Almaty polıtsııa departamentiniń baspasóz qyzmeti.
Eske salsaq, Almatydaǵy Meladze kontsertinde tóbeles shyǵarǵan áıel 5 táýlikke qamaldy.