Almatyda armııalyq qoıan-qoltyq urys boıynsha chempıonat jeńimpazdary anyqtaldy
ASTANA. KAZINFORM — Almatyda Armııanyń ortalyq sport klýbynda armııalyq qoıan-qoltyq urys boıynsha Qarýly kúshterdiń chempıonaty ótti, dep habarlaıdy Qorǵanys mınıstrliginiń baspasóz qyzmeti.
Jarysqa Qarýly kúshterdiń túrleri, óńirlik qolbasshylyqtar men joǵary áskerı oqý oryndarynyń namysyn qorǵaǵan 17 komandanyń quramyndaǵy 115 sportshy qatysty.
Chempıonattyń ashylý saltanatynda QR Qorǵanys mınıstrligi Sport komıteti tóraǵasynyń orynbasary polkovnık Erkebulan Túsiphanov armııalyq qoıan-qoltyq urystyń áskerı qyzmetshilerdi daıarlaýda erekshe mańyzǵa ıe ekenin atap ótti.
— Armııalyq qoıan-qoltyq urys jaýyngerdiń kúsh-qýatyn arttyryp, tózimdiligin shyńdaıdy, ózine degen senimdiligin nyǵaıtady jáne kez kelgen tapsyrmany oryndaýǵa ázir bolýǵa tárbıeleıdi. Qorǵanys pen shabýyldyń osy ámbebap tásilin árbir áskerı qyzmetshi jetik meńgerýi tıis, — dedi ol.
Chempıonat qorytyndysy boıynsha komandalyq esepte 32039 áskerı bóliminiń quramasy top jardy. Desanttyq-shabýyldaý áskerleriniń sportshylary kúmis júldege ıe bolsa, úshinshi oryndy «Ońtústik» óńirlik qolbasshylyǵy komandasy enshiledi.
Jekeleı syn nátıjesinde 32039 áskerı bóliminiń ókilderi leıtenant Erjan Oljas (70 kelige deıin), maıor Vadım Fedoseev (75 kelige deıin), serjant Azamat Asylbekuly (90 kelige deıin) jáne serjant Elaman Qýatov (90 keliden joǵary) chempıon atandy.
Sondaı-aq Desanttyq-shabýyldaý áskerleriniń áskerı qyzmetshileri leıtenant Aıdyn Nurıdınov (55 kelige deıin), qatardaǵy jaýynger Qasymbaı Muhıt (65 kelige deıin), efreıtor Darhan Dabylbek (80 kelige deıin) jáne «Ońtústik» óńirlik qolbasshylyq quramasynyń sportshysy efreıtor Dosqalı Ashırov (85 kelige deıin) óz salmaq dárejelerinde jeńimpaz atandy.
«Úzdik tehnıka úshin» nomınatsııasy Áýe qorǵanysy kúshteri áskerı ınstıtýtynyń kýrsanty Arlan Meıirbekke tabystalsa, «Jeńiske degen jigeri úshin» nomınatsııasyn «Shyǵys» óńirlik qolbasshylyǵynyń ókili kishi serjant Madhat Oljabaev ıelendi.
Bıylǵy chempıonat Armııalyq qoıan-qoltyq urys halyqaralyq federatsııasynyń jańa erejelerine sáıkes jańartylǵan formatta ótkizildi. Jarys barysynda qatysýshylar joǵary daıyndyq deńgeıin, berik komandalyq rýh pen jeńiske degen umtylysyn pash etti.
Aıta keteıik, Qorǵanys mınıstrliginiń Sport komıteti barlyq komandalardy qajetti sporttyq jabdyqtarmen tolyq qamtamasyz etip, jarystyń joǵary deńgeıde ótýine úlken úles qosty.
Buǵan deıin arnaıy operatsııalar kúshteriniń áskerıleri qoıan-qoltyq urystan 9 medal oljalaǵanyn jazǵanbyz.
