Almatyda árbir jetinshi kóliktiń zııandy shyǵaryndylary normadan asqan
ALMATY. KAZINFORM - Almatyda avtokólikterden bólinetin zııandy shyǵaryndylardy azaıtýǵa jáne aýa sapasyn jaqsartýǵa baǵyttalǵan Low Emission Zone (LEZ) jobasyn engizý boıynsha pılottyq jumys jalǵasyp jatyr.
Qyrkúıek aıyndaǵy monıtorıng boıynsha baqylaý beketterinde 6833 avtokólik tekserildi. Onyń 922-sinde (13,5%) zııandy shyǵaryndylar deńgeıi belgilengen normadan asqany anyqtaldy.
Janarmaı júıesin rettegennen keıin 561 avtokólik qaıta ólsheýden sátti ótti. Bul ýaqytyly tehnıkalyq qyzmet kórsetý men avtokólik júıelerin durys retteý zııandy shyǵaryndylar kólemin azaıtýǵa yqpal etetinin kórsetedi.
- Mamandardyń málimetinshe, Almatydaǵy aýa lastanýynyń shamamen 70%-y avtokólikterden shyǵatyn zııandy zattarǵa baılanysty. Osyǵan oraı kólik shyǵaryndylaryn baqylaý jáne júrgizýshilerdiń ekologııalyq jaýapkershiligin arttyrý qaladaǵy aýa sapasyn jaqsartýdyń negizgi baǵyttarynyń biri sanalady, - dep málimdedi ákimdik.
Qazirgi kezeńde joba pılottyq rejımde jumysyn jalǵastyryp jatyr. Jınalǵan derekter aldaǵy taldaý jumystary men tıisti sheshimder ázirleý úshin paıdalanylady. Joba aıasynda qalaǵa kirýge shekteý engizý, aıyppul salý nemese jol júrý aqysyn alý kózdelmegen. Pılottyq joba bıyldyń sońyna deıin jalǵasady.
Eske salsaq, buǵan deıin Almatyda LEZ aımaǵynyń shekteýleri men jumys tártibi túsindirildi.
Sondaı-aq LEZ jobasy aıasynda jol belgileri ornatylǵan edi
