Almatyda aptap ystyqtan elektr energııasy jappaı óshti
ALMATY. KAZINFORM — Almatyda 17-20 shilde aralyǵynda elektr jelisiniń jumysynda aqaýlar boldy. Alataý Jaryq Kompanııasy bul jaǵdaıdy aptap ystyqqa baılanysty elektr jelilerine túsken júktemeniń kúrt artýymen túsindirdi.
Kompanııa málimetinshe, atalǵan kezeńde elektr jabdyqtaýdaǵy irkilister qalanyń túrli aýdandarynda tirkelgen. Olar AJK jelilerin de, Almaty qalasynyń kommýnaldyq menshigindegi jáne senimgerlik basqarý sharttary aıasynda paıdalanylatyn elektr jelilerin de, sondaı-aq tutynýshylarǵa tıesili abonenttik jelilerdi de qamtyǵan.
— Birqatar jaǵdaıda elektr jelileriniń birneshe elementi birge zaqymdandy. Bul apattyq-qalpyna keltirý jumystarynyń uzaqtyǵyn arttyrdy, óıtkeni bireýi jóndelgennen keıin jeliniń basqa ýchaskelerinde aqaýlar anyqtalyp otyrdy, — dep túsindirdi kompanııa ókilderi.
Anyqtalǵan aqaýlardy joıý úshin 17-20 shilde aralyǵynda 35 óndiristik brıgada jumyldyrylǵan.
Qazir qalada elektrmen jabdyqtaý senimdiligin arttyrý úshin elektr jelilerin jańǵyrtýdyń aýqymdy baǵdarlamasy júzege asyrylyp jatyr. Oǵan kabeldik jáne áýe elektr jelilerin rekonstrýktsııalaý men salý, transformatorlyq jáne taratýshy qosalqy stantsııalardy jańǵyrtý, fızıkalyq jáne moraldyq turǵydan tozyǵy jetken jabdyqtardy aýystyrý, kúrdeli ári aǵymdaǵy jóndeý júrgizý, sondaı-aq zamanaýı tehnıkalyq sheshimderdi engizý kiredi.
Eske salaıyq, buǵan deıin Almatynyń bir bóligi jaryqsyz qalyp, «Kóktóbe» aspaly joly ýaqytsha toqtady.
