Almatyda aptap ystyq kezinde kóshelerde aeratsııa jumystary kúsheıtiledi
ALMATY. KAZINFORM — «Qazgıdromet» RMK mamandarynyń málimetinshe, 16–20 shilde aralyǵynda Almatyda aýa raıy shamadan tys ystyq bolady. Keı jerlerde aýa temperatýrasy +42 gradýsqa deıin jetip, bıylǵy maýsymda alǵash ret +40 gradýstan asyp, klımattyq normadan edáýir joǵary bolady.
Osyǵan baılanysty aýa temperatýrasynyń kóterilýine oraı kóshe-jol jelisin kútip ustaý jáne qalalyq aýmaqtardy qosymsha salqyndatý sharalaryn kúsheıtý týraly sheshim qabyldandy.
Almaty kommýnaldyq ınfraqurylymdy damytý jáne turǵyn úı ınspektsııasy basqarmasy ókilderiniń málimetinshe, osy kezeńde negizgi magıstraldyq kóshelerde jáne adam kóp júretin ýchaskelerde jol jabynyn sýaryp, aýaǵa sý búrký (aeratsııa) jumystaryn júrgizetin 16 arnaıy tehnıka baǵanasy jumyldyrylady. Jumystar táýliktiń eń ystyq ýaqytynda júrgizilip, qalanyń 128-den astam kóshesin qamtıdy.
Sonymen qatar kóshe-jol jelisin kúndelikti sanıtarlyq kútip ustaý jumystary jalǵasady.
— Qazirgi ýaqytta joldy, trotýardy, aıaldama pavılondaryn jáne qalalyq ınfraqurylymnyń basqa da nysandaryn jýýǵa 500-den astam arnaıy tehnıka jumyldyrylǵan, — delingen habarlamada.
Aeratsııa jáne sýarý jumystary jol jabyny mańyndaǵy aýa temperatýrasyn tómendetýge, shańnyń kóterilýin azaıtýǵa, asfalttyń qyzyp ketýiniń aldyn alýǵa jáne osyndaı aptap ystyq kezinde jol jabynyna túsetin temperatýralyq júktemeni tómendetýge múmkindik beredi.
Eske salaıyq, buǵan deıin Qazaqstannyń ońtústiginde 48 gradýsqa deıin aptap ystyq bolatynyn jazǵanbyz.
