Almatyda apattyq jóndeý jumystaryna baılanysty kóshe jabylady
ALMATY. KAZINFORM — Almatyda elektr jelilerindegi apattyq jóndeý jumystaryna baılanysty kólik qozǵalysy ýaqytsha shekteledi.
«Alataý Jaryq Kompanııasy» AQ málimetinshe, 31 qazan men 7 qarasha aralyǵynda Medeý aýdanynda № 2353 joǵary kerneýli 220 kV elektr kabel jelisinde júrgiziletin apattyq-qalpyna keltirý jumystaryna baılanysty kólik qozǵalysy ýaqytsha shekteledi.
Shekteýler Ular kóshesinen Ladýshkın kóshesimen qıylysqa deıingi jol bóligin qamtıdy. Jóndeý jumystary Ladýshkın kóshesindegi № 125 úıdiń mańynda júrgiziledi. Atalǵan aýmaqta jol boıynyń astynda ornalasqan elektr kabeli zaqymdanǵan.
Kompanııanyń málimetinshe, bul jeli «Ermensaı» jáne «Besaǵash» qosalqy stantsııalaryn baılanystyratyn Almatynyń aınalmaly elektrmen jabdyqtaý júıesine kiredi. Kabeldiń zaqymdanýyna baılanysty jeli ýaqytsha tuıyqtalmaǵan shema boıynsha jumys istep tur. Bul energııa júıesiniń basqa elementterine túsetin júktemeni arttyrady.
Aqaýdy joıý úshin mamandar jol jabyny men beton naýany ashyp, kabeldiń zaqymdanǵan bóligine qol jetkizýi qajet. Odan keıin jóndeý jumystary júrgizilip, jelini qaıta iske qosar aldynda tıisti synaqtar ótkiziledi.
— Apattyq-qalpyna keltirý jumystary táýlik boıy júrgiziledi. Jumys aıaqtalǵannan keıin jol jabyny tolyq qalpyna keltiriledi. Jóndeý jumystary Almaty qalasy men Almaty aglomeratsııasyn elektrmen jabdyqtaý júıesiniń qalypty jumys tártibin qalpyna keltirý úshin qajet, — dep habarlady «Alataý Jaryq Kompanııasy».
Eske salaıyq, buǵan deıin Almatyda 1 aı buryn jóndelgen jol qaıtadan qazylyp jatqanyn jazǵanbyz.
