Almatyda qýraǵan aǵashtardyń ornyna iri kóshetter otyrǵyzylady
ALMATY. KAZINFORM – Almatyda Sátbaev kóshesiniń boıyndaǵy qýraǵan qylqan japyraqtylardy kesip, ornyna jańasyn otyrǵyzady.
Sarapshylar Sátbaev kóshesindegi avtoturaq mańyndaǵy quraǵan shyrshalardyń jaǵdaıyna qatty alańdaýshylyq bildirdi. Aǵashtardyń dińi shirı bastaǵan.
Jazken Jıembaev atyndaǵy Qazaq ósimdikterdi qorǵaý jáne karantın ǵylymı-zertteý ınstıtýtynyń ǵylymı qyzmetkeri Nurjan Muhamadıevtiń aıtýynsha, qylqan japyraqty aǵashtarǵa 60-70 jyl bolǵanymen, áli kári deýge kelmeıtin jasyl jelek. Dese de, qala ekologııasynda mundaı aǵashtar ormandaǵydaı uzaq jasaı bermeıdi.
– Shyrshalarǵa 60-70 jyl bolǵan. Dıametri 30 sm-den asady. Inelerde anyq emes daqtar, kúnniń áserinen kúıgen belgiler bar. Tamyr mańyndaǵy qorektený aýmaǵy azaıǵan. Qabyǵyna mehanıkalyq zaqym kelgen jaǵdaı bar. Sanıtarlyq jaǵdaı boıynsha bul aǵashtar álsiz dep baǵalandy (KSO-3). Dekoratıvtik qasıetin joǵaltqandyqtan, olardy tózimdi qylqan japyraqty aǵash túrlerine aýystyrý usynylyp otyr, – dedi Muhamadıev.
«EkoAlmaty» JShS-niń bólim basshysy Bolat Ámirǵalıev rezıstograf arqyly júrgizilgen zertteýler aǵashtardyń quryp bara jatqanyn, zııankester men aýrýlardyń keń taraǵanyn kórsetkenin atap ótti.
– Skverdegi keıbir shyrshalar tolyqtaı qýrap qalǵan, birinshi kezekte solardy kesý kerek, – dedi ol.
«Jasyl komıssııa» múshesi Omar Nurhaıdarovtyń sózinshe, dińine deıin shirip ketken mundaı aǵashtardyń daýyl tursa qulaýy múmkin. Sondyqtan barlyǵyn kesip tastap, ornyna jańasyn otyrǵyzý kerek.
Kóshpeli keńes nátıjesinde eski aǵashtardyń ornyna iri kóshetter otyrǵyzý týraly sheshim qabyldandy. Jańa otyrǵyzylatyn shyrshalardyń bıiktigi tórt metrden kem bolmaıdy. ıAǵnı tamyr júıesi jaqsy damyǵan. Mundaı aǵashtar qazir qala klımatyna beıimdelgen jergilikti tálimbaqta ósirilip jatyr.