Almatyda «Altyn jas» baǵdarlamasymen 355 zeınetker jumysqa ornalasty
ALMATY. KAZINFORM - Almatyda «Altyn jas» baǵdarlamasy arqyly zeınet jasynan asqan 355 turǵyn jumysqa ornalasty. Zeınetkerlerdi jumysqa ornalastyrýǵa arnalǵan áleýmettik baǵdarlama jaz kezinde alǵash ret iske qosyldy.
Almaty ákimdiginiń málimetinshe, mamandar baǵdarlamany bastamas buryn zeınetkerler arasynda saýalnama júrgizgen. Onyń nátıjesi 80 jasqa deıingi zeınetkerlerdiń jartysyna jýyǵy eńbek etkisi keletinin kórsetken.
«Árbir jumys berýshi egde jastaǵy qyzmetkerdi jumysqa ala bermeıdi. Zeınetkerlerdiń tájirıbesi men energııasy úshin «Altyn jas» baǵdarlamasy óte tıimdi boldy. Onyń ereksheligi – zeınetkerlik jastaǵy adamdardy jumysqa qabyldaıtyn jumys berýshilerge qyzmetker jalaqysynyń 50% -y sýbsıdııalanady, biraq sýbsıdııalanatyn soma 85 myń teńgeden aspaýy kerek», - dep habarlady ákimdikten.
«Altyn jas» baǵdarlamasyna qatysýdyń basty talaptary – Almatyda tirkelý jáne megapolıste turaqty turý. Baǵdarlamaǵa qatysýǵa ótinishti onlaın rejıminde a.jas@almaty.gov.kz arqyly nemese Eńbek mobıldiligi ortalyǵyna (Dostyq dańǵyly, 85, 2 qabat, kab. 201 a) baryp berýge bolady.
71 jastaǵy Erbolat Mustafın «Altyn jas» baǵdarlamasy arqyly jeke kompanııa basshysynyń kómekshisi retinde jumysqa turǵan.
«Meniń zeınetke shyqqanyma 8 jyl boldy. Jas urpaqqa beretin qundy tájirıbem bar. Bul baǵdarlama zeınetkerler úshin óte paıdaly. Eger adamnyń bilimi, jumys isteýge degen qushtarlyǵy bolsa, ol zańdy túrde jumys isteı alýy kerek. «Altyn jas» baǵdarlamasy biz úshin úlken qoldaý», - dedi Erbolat Mustafın.
Eske salaıyq, buǵan deıin Almatyda jumysqa ornalasýǵa kómektesetin qandaı baǵdarlamalar bar ekenin jazǵanbyz.
