Almatyda alty magıstraldy kóshe uzartylady
ALMATY. KAZINFORM – Almatydaǵy uzartylatyn alty magıstraldy kósheniń jobalaý-smetalyq qujattamasy ázirlenip jatyr.
Qalalyq mobıldilik basqarmasynyń málimetinshe, Tóle bı kóshesin ıAssaýı kóshesinen qala shekarasyna deıin uzartý boıynsha jer telimderin satyp alýǵa baılanysty jol-qurylys jumystary jáne ınjenerlik jelilerdi qaıta qurý júrgizilip jatyr. Uzyndyǵy 4,5 km joba eki ýchaskege bólingen. Jumys 2025 jyldyń sońyna deıin aıaqtalady.
Bıyl uzyndyǵy 4,3 km bolatyn Hmelnıtskıı kóshesin «Qaırat» shaǵyn aýdanynan Talǵar tas jolyna deıin uzartý jáne Raıymbek dańǵylyn Jetisý kóshesinen Talǵar tas jolyna deıin uzartyp salý boıynsha qurylys-montajdaý jumystaryn bastaý josparlanǵan.
«Bıyl uzyndyǵy 0,6 shaqyrym bolatyn Muqanov kóshesin Raıymbek dańǵylynan Maqataev kóshesine deıin uzartý jumystary bastalady. Osy aýmaqtar boıynsha jobalyq qujattama ázirlenip, saraptamada jatyr. Jer teliminiń alynýyna qaraı Jubanov kóshesin Momyshuly kóshesinen qala shekarasyna deıin uzartý jumystary júrgiziledi. Joba boıynsha jalpy uzyndyǵy 3,9 km bolatyn 2 kezek qarastyrylǵan. Aıaqtalý merzimi - 2026 jyldyń sońyna deıin», - delingen habarlamada.
Buǵan qosa, 2024 jyly uzyndyǵy 0,3 km bolatyn Ońǵarsynova kóshesin Raıymbek dańǵylyna deıin uzarý jumystaryn bastaý josparlanyp otyr. Qazirgi tańda jobalaý-smetalyq qujattama ázirlenip jatyr.
Basqarmadan atap ótkendeı, osy jyldyń sońynda Seıfýllın dańǵyly men Jansúgirov kóshesiniń qıylysyndaǵy jolaıyryq ashý kózdelgen. Sondaı-aq Saın kóshesi men Móńke bı kóshesiniń qıylysynda jolaıyryqty paıdalanýǵa berý josparda tur.
Sonymen birge jyl sońyna deıin Saın kóshesin Rysqulov dańǵylynan Aqyn Sara kóshesine deıin jáne Abaı dańǵylyn Stroıtelnaıa kóshesinen qala shekarasyna deıin uzartý jumystary aıaqtalady.
