Almatyda alleıa orny brýschatka tastaıtyn qoqys alańyna aınalǵan ba
ALMATY. KAZINFORM — Almatyda jóndeý jumystarynan keıin alynǵan brýschatkalardyń úıindisi tabyldy.
Áleýmettik jelide er adam qorshalǵan aýmaqta úıilip jatqan tas tóseýishterdiń beınejazbasyn jarııalady.
Avtordyń aıtýynsha, buryn aýmaqta shaǵyn alleıa bolǵan jáne jóndeý jumystary josparlanǵan. Alaıda keıin oryn tas tóseýishterdi tastaıtyn qoqys alańyna aınalǵan. Sondaı-aq beınejazba avtory materıaldardyń pishini ártúrli bolǵanymen, áli de jaqsy kúıde ekenin atap ótti.
Bul derekke qatysty Bostandyq aýdany ákiminiń orynbasary Jandos Tákibaev túsinikteme berip, beıneúndeý jasady. Onyń aıtýynsha, atalǵan brýschatkalar Gagarın men Sı Sınhaı kósheleriniń qıylysyndaǵy aýmaqta ornalasqan. Olar Esentaı ózeniniń jaǵalaýyn rekonstrýktsııalaý jumystary aıasynda Ál-Farabı dańǵylynan Tımırıazev kóshesine deıingi aralyqta alynǵan.
Ol bul jumystar memlekettik qarjyǵa emes, jeke qurylys kompanııasy tarapynan memorandým sheńberinde júrgizilip jatqanyn aıtty.
— Alynǵan brýschatka kommýnaldyq kásiporyndarǵa qysqy maýsymda júrgiziletin apatty-qalpyna keltirý jumystaryna paıdalaný úshin beriledi. Materıal «Almaty Sý» mekemesi men «Almaty jylý jelileri» kásipornyna qabyldap-tapsyrý aktisi negizinde ótkiziledi, — dep túsindirdi Jandos Tákibaev.
Sóz sońynda ákim orynbasary turǵyndardy tek resmı aqparat kózderine senýge jáne tekserilmegen málimetterdi taratpaýǵa shaqyrdy.
Eske salaıyq, buǵan deıin jóndeý jumystary júrgizilip jatqan Úlken Almaty ózeniniń jaǵalaýynda granıt plıtalar alynyp, qulyptas ázirleıtin tsehke tasymaldanǵan. Bul derekke qatysty polıtsııa tekserý júrgizip, qylmystyq is qozǵady.
Kazinform agenttigi 1 aıǵa jýyq ýaqyttan keıin tergeý qanshalyqty alǵa jyljyǵanyn anyqtady.