Almatyda Álııa men Mánshúk saıabaǵyn rekonstrýktsııalaý qashan aıaqtalady
ALMATY. KAZINFORM – Almatyda ótken jyly kóktemde Qazaq – Brıtan tehnıkalyq ýnıversıtetine qarama-qarsy ornalasqan Álııa men Mánshúk saıabaǵyn rekonstrýktsııalaý jumystary bitýi tıis bolǵan. Alaıda merdiger uıym jumystardy bastaǵanmen aıaqsyz qaldyrǵan. Búginde almatylyqtardyń súıikti ornyna aınalǵan jer qorshaý ishinde tur. Onda eshqandaı jumystar júrip jatqan joq. Kazinform fototilshisi saıabaqty aralap, onyń qazirgi bet-beınesin sýretke túsirdi.
2022 jyldyń 15 qyrkúıek kúni Almaty qalasynyń ekologııa jáne qorshaǵan orta basqarmasy «ShAH qurylys kompanııasy» JShS merdiger uıymymen Baıseıitova kóshesiniń Qabanbaı batyr kóshesinen Bógenbaı batyr kóshesine deıingi aralyq pen Mánshúk Mámetova skverin abattandyrý jáne rekonstrýktsııalaý jumystaryn júrgizý boıynsha kelisimshart jasasqan.
«Syrjoba» JShS merdiger uıymy skverdi rekonstrýktsııalaý josparyn ázirlegen edi. Ol boıynsha oń qorytyndy alyndy. Nysannyń qurylysy 2023 jyldyń 31 mamyr kúni aıaqtalady dep josparlanǵan. Alaıda, merdiger uıym 2023 jyldyń qańtar aıynan mamyr aıyna deıin eshqandaı jumystar istemegen. Osyǵan baılanysty basqarma merdiger uıymnyń atyna shartty birjaqty tártippen buzý jáne jetkizýshini memlekettik satyp alýdyń josyqsyz qatysýshysy dep taný týraly sotqa júginý nıeti týraly habarlama joldady», - dep habarlady qalalyq Ekologııa jáne qorshaǵan orta basqarmasy.
Habarlamany alǵan soń merdiger uıym nysanda bólshekteý jumystary men abattandyrý jumystarynyń bir bóligin júrgizýdi bastady. Alaıda jumys kestesinen kóp artta qalýshylyqty eskere otyryp jáne teris saldaryn boldyrmaý úshin basqarma jetkizýshini memlekettik satyp alýǵa josyqsyz qatysýshy dep taný týraly sotqa talap aryz jiberdi.
«Keıin basqarma men merdiger uıymy arasynda kelisimshart buzyldy. Jetkizýshi memlekettik satyp alýdyń josyqsyz qatysýshysy bolyp tanyldy. Qazirgi ýaqytta merdiger uıymdy anyqtaý boıynsha konkýrstyq rásimder júrgizilýde, ol bıyl mamyr aıynda aıaqtalady. Qurylys-montaj jumystaryn bıylǵy qarasha aıynyń sońyna deıin aıaqtaý josparlanyp otyr», - dep habarlady vedomstvodan.
Sondaı-aq qalalyq Ekologııa jáne qorshaǵan orta basqarmasy Álııa men Mánshúk saıabaǵynda qansha aǵashtyń kesilgenin habarlady.
«2023 jyldyń kúzinde saıabaqta basqarma ǵylymı qyzmetkerlermen, ekobelsendilermen birlesip, qatty jaýyn-shashyn men qatty jeldiń saldarynan aýa raıynyń nasharlaýy kezinde qulaý qaýpin týdyratyn 130-ǵa jýyq qurǵaq apatty aǵashty kesip tastady. Álııa men Mánshúk saıabaǵynda barlyǵy 1681 aǵash ósedi. Kesilgen aǵashtardyń ornyna saıabaqta 150-den astam jas kóshet otyrǵyzyldy», - dep túsindirdi basqarmadan.
Eske salaıyq, Almaty ákimi ótken jyldyń sońyna deıin Álııa men Mánshúk saıabaǵy jóndelip, abattandyrylatynyn aıtqan bolatyn.
