Almatyda Álıhan Bókeıhanovtyń 160 jyldyǵyna arnalǵan jańa kitaptyń tusaýkeseri ótti
ASTANA. KAZINFORM — Qazaqstanda kórnekti memleket jáne qoǵam qaıratkeri, «Alash» qozǵalysynyń kóshbasshysy jáne Alash Orda qazaq avtonomııasynyń tuńǵysh premer-mınıstri Álıhan Bókeıhanovtyń 160 jyldyǵyna arnalǵan jańa kitap jaryq kórdi, dep habarlaıdy Kazinform agenttiginiń tilshisi
Kitaptyń tusaýkeseri Almatyda «Chehııa, Slovakııa jáne Japonııa arhıvterindegi Álıhan Bókeıhan beınesi men Alash Orda tarıhy» halyqaralyq ǵylymı-tájirıbelik konferentsııasynyń aıasynda ótti.
«Álıhan Bókeıhan. Qazaqstannyń tuńǵysh premer-mınıstri» atty kitapty Central Asia Production baspasy KAZ Minerals Tobynyń qarjylaı qoldaýymen qazaq jáne orys tilderinde basyp shyǵarǵan. Týyndyda HH ǵasyrdyń basyndaǵy ult kósemi, ári kórnekti memleket qaıratkeriniń ómirindegi mańyzdy kezeńder qamtylǵan.
Kitapta onyń balalyq shaǵy men shyqqan tegi, oqyǵan jyldary men ǵylymı qyzmeti, XX ǵasyr basyndaǵy saıası kúres kezeńderi, «Alash» qozǵalysy men Alash Orda úkimetiniń qurylýy jaıly baıandalady.
Týyndyda jarııalanǵan arhıvtik qujattar, sırek fotosýretter, tarıhı materıaldar men zamandastarynyń estelikteri Álıhan Bókeıhanovtyń bolmysy men onyń ıdeıalarynyń qazaq qoǵamy úshin mańyzdylyǵyn tereńirek túsinýge múmkindik beredi.
Bul eńbek KAZ Minerals Tobynyń Qazaqstannyń tarıhı murasyn saqtaý jáne ulttyq sanany nyǵaıtý baǵytyndaǵy jobalardy qoldaýǵa arnalǵan mádenı-aǵartý bastamalarynyń bir bóligi bolyp sanalady.
— Álıhan Bókeıhanovtyń Qazaqstan tarıhyndaǵy alar orny erekshe. Onyń bilim berý, ǵylym, ekonomıka men memlekettilik jaıly ıdeıalary óz zamanynan ozyq boldy. Mundaı jobalardy qoldaý — tarıhı sanany saqtap, elimizdiń tarıhynda óshpes iz qaldyrǵan tulǵalarǵa qurmet kórsetýge qosqan úlesimiz, — dep málimdedi «KAZ Minerals Management» JShS basqarma tóraǵasy Eldar Mamedov.
Kitapty daıyndaý barysynda avtorlar Qazaqstan men Reseıde aýqymdy zertteý jumystaryn júrgizgen.
— Jumys 2025 jyly bastaldy. Qazaqstandy biraz araladyq. Onyń týǵan jeri Qarqaralyda, Semeıdegi mýzeılerde, Astana men Almatyda jáne Máskeýde jumys júrgizdik. Biz mátindi foto jáne arhıvtik derektermen tolyqtyrý arqyly oqyrmannyń tarıhqa tereńirek úńilýine múmkindik beretin durys format oılap taptyq dep esepteımiz, — deıdi joba avtory, rejısser Berik Barysbekov.
Kitappen qatar «Álıhan Bókeıhan. Qazaqqa qyzmet qylmaı qoımaımyn» atty derekti fılm de túsirildi.
