Almatyda alǵashqy eko-hab ashyldy
ALMATY. KAZINFORM - Almatyda alǵashqy eko-habtyń resmı ashylýy ótti. Ortalyq eki apta buryn tehnıkalyq rejımde iske qosylǵan bolatyn.
Eko-habta turaqty negizde bilim jetildiretin lektsııalar, shıkizattan buıymdar jasaý boıynsha oqytý dáristeri jáne sheberlik synyptary ótkiziletin bolady. Ortalyqta qatty qaldyqtardy qaıta óńdeý men paıdaǵa jaratýǵa arnalǵan eko-startaptary bar shaǵyn kásipkerler jumys isteıdi. Sonymen qatar qala turǵyndary men qonaqtary eko-habqa kelip, ótkizýge bolatyn qoqystardy paıdaly bonýstarǵa aıyrbastaı alady.
- Eko-habtyń birneshe qyzmeti bar. Bizge kez kelgen adam úıden qoqystardy suryptap ákelip, bótelke, plastık, ózge de qaldyqtardy ótkize alady. Biraq qaladaǵy qoqys qabyldaıtyn basqa oryndardan ereksheligi - munda shampýn, gel qutylary syndy basqa jerler almaıtyn qaldyqtardy ákelýge bolady. Sondaı-aq kelgen turǵyn qoqysty jaı qaldyryp kete salmaı, odan saǵat, vaza jáne basqa da buıymdardy óz qolymen jasaı alady. Turǵyndarǵa bizdiń mamandar kómektesedi. Oǵan qosa, biz qaıta óńdeýmen aınalysatyn jeke kompanııalarmen jumys isteımiz. Zaýyttar tikeleı osy jerden suryptalǵan qaldyqtardy alyp ketedi. Adamdar kóbine mundaı zaýyttardyń bar ekenin bilmeıdi. Mysaly, Qonaev qalasynda plastık bótelkelerdi qaıta óńdeıtin kásiporyn ashylyp jatyr. Al Almatyda alıýmınııdi paıdaǵa jaratatyn zaýyt iske qosylmaq. Qaskeleńde plenka, paketter qaıta jasalady. Eko-habqa kelgen adamdar osy zaýyttardyń jumysymen tanysyp, bizdiń teledıdardan kóre alady, - dedi Eco Network jobasynyń negizin salýshy Evgenıı Muhamedjanov.
Joba avtorlarynyń aıtýynsha, eko-habtyń negizgi maqsaty - ekologııalyq jaýapkershilik mádenıetin damytý, qaldyqtardy bólek jınaý men qaıta óńdeýdi nasıhattaý, qorshaǵan ortaǵa uqypty qaraý qundylyqtaryn sińirý.
- Plastık bótelkeniń, shampýn qutysynyń qaqparyn jınap, shrederge, ıaǵnı usatqysh apparatqa ótkizemiz. Odan keıin shıkizatty “press” dep atalatyn apparatqa ártúrli daıyn formalarǵa salyp, eritemiz. Sosyn ol formada boıynsha saǵat ne basqa zattardy jasaımyz. Bir buıymdy jasaýǵa shamamen 200-300 qaqpaq kerek. Bolashaqta plastık bótelkeniń ózinen birnárse jasasaq dep júrmiz, - dedi óndiristik jumystardyń ınjeneri Murat Amanjolov.
