Almatyda alǵash ret úsh naýqasqa fızıologııalyq stımýlatsııalaý júıesi ornatyldy

ASTANA. KAZINFORM — Almaty qalalyq kardıologııa ortalyǵynda alǵash ret júrektiń ótkizgish júıesin fızıologııalyq stımýlıatsııalaýdyń jańa býyndaǵy júıelerin ımplantatsııalaý otasy júrgizildi. Bul týraly Densaýlyq saqtaý mınıstrligi habarlady.

Qurylǵylar júrek yrǵaǵy buzylǵan úsh naýqasqa ornatyldy. Implantatsııa arıtmologııa bóliminiń meńgerýshisi Artýr Abdymomýnov pen shaqyrylǵan sarapshy — professor Krzysztof Boczar, MD, PhD (Krakov, Polsha) jetekshilik etken bilim berý master-klasy aıasynda ótti.

CSP ádistemesi arıtmologııadaǵy zamanaýı baǵyttardyń biri bolyp sanalady jáne júrektiń tabıǵı jumysyna barynsha jaqyn belsendirýdi qamtamasyz etedi. Dástúrli stımýlıatsııamen salystyrǵanda, CSP qarynshalardyń sınhrondy jıyrylýyn saqtaıdy, júrek jetispeýshiligi qaýpin tómendetedi jáne naýqastardyń ómir sapasyn jaqsartady.

Júıeler ótkizgishtik buzylystary, sınýs túıininiń álsizdik sındromy jáne sozylmaly júrek jetispeýshiligi kezinde ımplantatsııalanady. Ota barysynda Biotronik kompanııasynyń CLS (Closed Loop Stimulation) tehnologııasymen jabdyqtalǵan elektrokardıostımýlıatorlary qoldanyldy. Bul tehnologııa júrek soǵý jıiligin fızıkalyq jáne emotsııalyq júktemelerge qaraı retteýge múmkindik beredi. Sonymen qatar qurylǵylar Home Monitoring júıesin qoldaıdy. Ol patsıentterdiń jaǵdaıyn qashyqtan baqylaýǵa jáne densaýlyqtaǵy ózgeristerge der kezinde áreket etýge múmkindik beredi.

Ortalyq dırektory Ermaǵambet Qýatbaev zamanaýı tehnologııalardy engizý jáne dárigerlerdi ozyq ádisterge úıretý qalanyń kardıologııalyq qyzmetin damytýdaǵy mańyzdy baǵyt ekenin atap ótti.

Aıta keteıik, Ulytaý oblysynda alǵash ret júrekke ashyq ota jasaldy.