Almatyda alǵash ret naýqas júregine kardıoverter-defıbrıllıator salyndy
ALMATY. KAZINFORM – Almaty qalasynyń Ortalyq qalalyq klınıkalyq aýrýhanasynda alǵash ret kardıoverter-defıbrıllıatordy (IKD) ornatý operatsııasy sátti júrgizildi. Bul zamanaýı qurylǵy júrektiń kenetten toqtap qalýynyń aldyn alýǵa arnalǵan.
Almaty qalasy densaýlyq saqtaý basqarmasynyń málimetinshe, aýrýhanaǵa júrek aýrýymen jáne aıqyn júrek jetkiliksizdigimen 58 jastaǵy naýqas túsken. Onda júrektiń jıyrylý fýnktsııasy aıtarlyqtaı tómendegen. Mundaı jaǵdaı naýqastyń ómirine qaýip tóndiretin júrek yrǵaǵynyń buzylystary, sonyń ishinde júrektiń kenetten toqtap qalýy qaýpi joǵary topqa jatqyzyldy. Sondyqtan qaıǵyly jaǵdaıdyń aldyn alý maqsatynda joǵary tehnologııalyq operatsııa jasaý týraly sheshim qabyldanǵan.
– IKD ımplantatsııasy jergilikti anestezııamen júrgizildi. Qurylǵy buǵana asty aımaǵyna ornatylyp, elektrodtar qan tamyrlary arqyly júrek qýystaryna jetkizildi. Qaýipti yrǵaq buzylysy týyndaǵan jaǵdaıda qurylǵy ony avtomatty túrde anyqtap, dereý áser etedi jáne júrektiń qalypty jumysyn qalpyna keltiredi. Kardıoverter-defıbrıllıator naýqasty ómirin statsıonarda da, aýrýhanadan shyqqannan keıin de turaqty túrde qorǵaýdy qamtamasyz etedi, - dep túsindirdi aýrýhana arıtmology Ǵanı Tólepbergenov.
Qazirgi tańda naýqastyń jaǵdaıy turaqty, ol ári qaraı ambýlatorııalyq baqylaýǵa shyǵarylǵan.
Eske salaıyq, buǵan deıin Shymkentte alǵash ret óte sırek kezdesetin kúrdeli ota sátti jasaldy.