Almatyda alǵash ret estetıkalyq toptyq gımnastıkadan álem chempıonaty ótti
25-26 qarasha kúnderi Almaty qalasynda alǵash ret estetıkalyq toptyq gımnastıkadan álem chempıonaty, jasóspirimder arasyndaǵy álem chempıonaty jáne IFAGG Trophy 2023 jarysy ótti, dep habarlaıdy Kazinform.
«Álem birinshiligi alǵash ret Azııa qurlyǵynda uıymdastyryldy. Sondaı-aq, chempıonat aıasynda Tórt qurlyq chempıonaty men Almaty Cup ótti. Jarysqa álemniń 16 elinen – Aýstrııa, Bolgarııa, Italııa, Ispanııa, Serbııa, Frantsııa, Izraıl, Mysyr, Japonııa, Malaızııa, AQSh, Qyrǵyzstan, Qazaqstan jáne halyqaralyq estetıkalyq toptyq gımnastıka federatsııasynyń (IFAGG) sportshylary eń myqty sport komandalary qatysty», - dedi «Qazaqstan estetıkalyq toptyq gımnastıka federatsııasy» QB prezıdenti Mádına Bekturǵanova elordada ótken baspasóz konferentsııasynda.
Bul baıqaýlarda jalpy 50 medal jıyntyǵy sarapqa salyndy.
«Álem chempıonaty – estetıkalyq toptyq gımnastıka álemindegi óte mańyzdy oqıǵa, Azııada ol alǵash ret ótti. Alǵa qoıǵan barlyq mindetter oryndaldy. Komandalyq esepte bizdiń senorlar quramasy qola júldeger atandy. Jasóspirimder sanatynda jeke esepte Qazaqstan tarıhynda tuńǵysh ret astanalyq Samruk komandasy úshinshi oryndy ıelendi. Sonymen birge, olar tórt qurlyq chempıonatynyń jeńimpazdary jáne Almaty Cup halyqaralyq týrnıriniń altyn júldegerleri boldy. Jalpy komandalyq birinshilikte Qazaqstan ekinshi oryndy ıelendi. Estetıkalyq toptyq gımnastıkanyń Qazaqstanda 5 jyldan beri damyp kele jatqanyn eskersek, bul úlken jetistik», - dedi estetıkalyq toptyq gımnastıka boıynsha QR bas jattyqtyrýshysy Venera Jaılaýova.
Spıkerlerdiń aıtýynsha, Qazaqstanda estetıkalyq toptyq gımnastıka federatsııasy 2018 jyly paıda boldy. Qazirgi ýaqytta respýblıka boıynsha 9 respýblıkalyq fılıal jáne 13 jergilikti federatsııa jumys isteıdi.
«Estetıkalyq toptyq gımnastıka – sınhrondy túrde oryndalatyn dene qımyldary. Bul komandalyq sport, onda tepe-teńdik, sekirý jáne tirek bolý elementteri bar. Meniń oıymsha, bul óte áserli sport túri. Eger Almaty qalasynda ótken álem chempıonatynda bolsańyzdar, kórermenniń osy sport túrine degen asqan qyzyǵýshylyǵyn kórgen shyǵarsyzdar. Estetıkalyq toptyq gımnastıka bir kúni olımpıadalyq sport túrine aınalady», - deıdi M. Bekturǵanova.
