Almatyda alǵash ret álemdegi eń iri IT-kórmelerdiń biri ótedi
ALMATY. KAZINFORM – Almaty qalasynyń ákimi Darhan Satybaldy 1981 jyldan beri jahandyq tehnologııalyq trendterdi qalyptastyryp kele jatqan, álemdegi eń iri tehnologııalyq kórme — GITEX-tiń ǵalamdyq uıymdastyrýshysy inD kompanııasynyń ókilderi Trıksı Lo Mırmand pen Rýpert Adammen kezdesti.
Kezdesý barysynda Almatyda GITEX AI Central Asia & Caucasus Kazakhstan kórmesin ótkizý máseleleri jáne ony uıymdastyrýdyń naqty qadamdary talqylandy. Qala ákimi atap ótkendeı, Almaty brendtiń Ortalyq Azııaǵa ený núktesine aınalyp, halyqaralyq yntymaqtastyqty keńeıtýge, ınvestıtsııa tartýǵa jáne tehnologııalyq startaptardy ilgeriletýge jańa múmkindik ashady.
— Almaty óńirdegi jetekshi IT-hab retinde ózin áldeqashan tanytty: munda tehnologııalyq kompanııalar, halyqaralyq ortalyqtar shoǵyrlanǵan jáne belsendi startap-ekojúıe qurylǵan. GITEX forýmyn ótkizý bul jetistikterdi halyqaralyq deńgeıde tanystyrýǵa jáne qalaǵa jańa seriktester men ınvestorlardy tartýǵa múmkindik beredi, — dedi Darhan Satybaldy.
Onyń aıtýynsha, ınfraqurylymdy daıyndaý máselesine erekshe nazar aýdarylǵan. Atap aıtqanda, «Atakent» QІYO alańyn jańǵyrtý, logıstıkany uıymdastyrý jáne barlyq tartylǵan qyzmetterdiń úılesimdi jumysyn qamtamasyz etý kózdelgen. Almaty ákimi salalyq basqarmalarǵa uıymdastyrýshylarmen birlesip, daıyndyqtyń egjeı-tegjeıli josparyn ázirlep, onyń naqty oryndalýyn qamtamasyz etýdi tapsyrdy.
— Almaty Eýropa men Azııa toǵysyndaǵy mańyzdy ınnovatsııalyq ortalyqtardyń birine aınalyp keledi. Bul — Qazaqstannyń tsıfrlyq jáne jasandy ıntellekt baǵytyndaǵy ambıtsııalary naqty ekonomıkalyq ınfraqurylymǵa ulasatyn qala. GITEX osy úderisti jedeldetý úshin asa qolaıly kezeńde kelip otyr. Bul óńirdiń tehnologııalyq áleýetin, ınvestıtsııalyq tartymdylyǵyn jáne jahandyq baılanysyn kúsheıtedi. Nátıjesinde aımaq jasandy ıntellektke negizdelgen jańa ekonomıkanyń mańyzdy qatysýshysy retinde ornyǵady», — dep atap ótti inD kompanııasynyń bas dırektory, GITEX-tiń ǵalamdyq uıymdastyrýshysy Trıksı Lo Mırmand óz sózinde.
Onyń aıtýynsha, 45 jyldan astam ýaqyt ishinde GITEX úkimetter, korporatsııalar, startaptar, ınvestorlar jáne tehnologııalyq ekojúıeniń negizgi oıynshylary arasynda senimdi seriktes retinde halyqaralyq bedelge ıe bolyp, álemdegi eń iri tehnologııalyq is-sharalar brendine aınaldy.
Búginde GITEX 14 qala men elde, sonyń ishinde Abý-Dabı, Dýbaı, Brazılııa, Egıpet, Germanııa, Qazaqstan, Kenııa, Marokko, Nıgerııa, Serbııa, Sıngapýr, Túrkııa jáne Vetnamda ótkiziledi.
GITEX AI Central Asia & Caucasus Kazakhstan kórmesi Almatyda 2026 jyly 4–5 mamyr kúnderi ótedi. Іs-sharaǵa álemniń ár túkpirinen startaptar, ınvestorlar jáne memlekettik qurylymdardyń ókilderi qatysady. Kórmeniń ótkizilýi qala men búkil óńir úshin mańyzdy oqıǵaǵa aınalyp, tehnologııalyq salanyń damýyna, halyqaralyq áriptestikti nyǵaıtýǵa jáne ınnovatsııalyq ekonomıkany qurýǵa qosymsha serpin beredi.
2026 jylǵy ekspozıtsııa úsh basym baǵytqa shoǵyrlanady: jasandy ıntellekt (tehnologııalardy qalalyq orta men bızneske ıntegratsııalaý), GovTech (Qazaqstannyń tsıfrlyq memlekettik qyzmetter salasyndaǵy jetistikterin tanystyrý), kıberqaýipsizdik (derekterdi jáne bulttyq esepteýlerdi qorǵaý sheshimderi), sondaı-aq is-sharanyń qala ekonomıkasyna yqpaly (jyljymaıtyn múlik, valıýta jáne ınvestıtsııalar) qarastyrylady.