Almatyda alǵash ret 8 balaǵa artroskopııalyq ota jasaldy

ALMATY. KAZINFORM – Almatynyń Balalarǵa shuǵyl medıtsınalyq kómek kórsetý ortalyǵynda balalar artroskopııasy ádisi engizildi. 

Qoǵamdyq densaýlyq saqtaý basqarmasynyń málimetinshe, bul ádis týa bitken jáne júre paıda bolǵan tize býyny patologııasyn tıimdi emdeýge múmkindik beredi. Ortalyqta joǵary sanatty dáriger, travmatolog-ortoped Vladıslav Avramenkonyń qatysýymen balalar artroskopııasy boıynsha sheberlik dárisi ótti.

Úsh kún ishinde mamandar tirek-qımyl apparatynyń týa bitken aýytqýlary, sporttyq jáne turmystyq jaraqaty bar 15 balaǵa keńes berdi. 8 artroskopııalyq ota jasaldy.

– Almatyda alǵash ret dısplastıkalyq sındromdar, týa bitken aýytqýlar jáne patellıarlyq turaqsyzdyq kezinde patellany turaqtandyrý boıynsha az ınvazıvti ota jasaldy. Buǵan deıin mundaı ota ashyq ádispen jasalyp, ońaltý kezeńi bir jylǵa deıin sozylatyn. Jańa tásil qalpyna kelý merzimin 3-6 aıǵa deıin edáýir qysqartýǵa múmkindik beredi, - dedi ortalyq bólimshesiniń meńgerýshisi Meıirjan Qurmanalıev.

Barlyq ota mindetti áleýmettik medıtsınalyq saqtandyrý (MÁMS) aıasynda tegin júrgiziledi. Bul múmkindik Almaty qalasynyń turǵyndaryna ǵana emes, Qazaqstannyń ózge óńirlerinen kelgen balalarǵa da qoljetimdi.

2025 jyly ortalyqta tirek-qımyl apparatyna qatysty 180 artroskopııalyq jáne basqa da ota jasalǵan. Sheberdiń dárisine Qazaqstannyń túrli óńirinen kelgen 10 dáriger qatysty.

Eske salaıyq, buǵan deıin Almatyda alǵash ret neırostımýlıator ornatý boıynsha ota jasaldy.