Almatyda áleýmettik turǵydan osal turǵyndardy qoldaýǵa 30,5 mlrd teńge bólindi
ALMATY. KAZINFORM – Óńirlik kommýnıkatsııalar qyzmetinde Almaty qalasy ákiminiń orynbasary Nurlan Ábdirahym qatysqan halyqty áleýmettik qoldaý jáne turǵyndardy jumyspen qamtý máselelerine arnalǵan brıfıng ótti.
Nurlan Ábdirahymnyń aıtýynsha, Almaty ákimdiginiń basty basymdyqtarynyń biri – qala turǵyndarynyń ál-aýqatyn arttyrý, áleýmettik osal toptarǵa ataýly kómek kórsetý, áleýmettik ınfraqurylymdy damytý jáne árbir almatylyqtyń laıyqty ómir súrýine jaǵdaı jasaý.
Megapolıste 2,2 mıllıonnan astam adam turady, olardyń 370 myńǵa jýyǵy áleýmettik osal sanatqa jatady. Bul – zeınetkerler, múmkindigi shekteýli jandar, kópbalaly otbasylar, ardagerler, jetim balalar jáne ózge de sanattar.
Bıyl áleýmettik qoldaý sharalaryn iske asyrý úshin memlekettik bıýdjetten 30,5 mlrd teńge qarastyrylǵan.
– Áleýmettik tólemderdiń ataýlylyǵyn jáne ashyqtyǵyn qamtamasyz etý maqsatynda tsıfrlyq quraldar engizildi. Sonyń ishinde FSM Social mobıldi qosymshasy bıýdjet qarajatynyń tıimdiligin arttyrýǵa múmkindik beredi, - dedi Nurlan Ábdirahym.
2025 jyldyń 9 aıynda 190 myń adamǵa jalpy somasy 4,3 mlrd teńge kóleminde áleýmettik kómek kórsetildi, onyń ishinde az qamtylǵan otbasylarǵa ataýly áleýmettik kómek taǵaıyndaldy.
Almatyda sondaı-aq halyqtyń áleýmettik osal toptarynyń (HÁOT) quqyǵyn qorǵaý jáne olarmen ózara is-qımyl jasaý jónindegi ýákil ınstıtýty engizilgen. Bul júıe azamattardyń ótinishin júıeli túrde qaraýǵa jáne quqyqtyq qorǵaýdy kúsheıtýge baǵyttalǵan.
Jumyspen qamtý salasyna da erekshe kóńil bólinip otyr. 23 myń adam belsendi sharalarmen qamtylǵan, olardyń 11,4 myńy turaqty jumysqa ornalasqan, 11 myńy sýbsıdııalanatyn jumys oryndaryna jiberilgen, 770 adam kásibı oqýdan ótken. Sonymen qatar 433 jas kásipker memlekettik grant alyp, árqaısysyna 1,5 mln teńgeden bólingen. Onyń 63%-y – kópbalaly otbasylar.
Zeınet jasyndaǵy azamattardy eńbek qyzmetine tartý maqsatynda «Altyn jas» jobasy júzege asyrylyp jatyr. Sonyń sheńberinde zeınetkerlerdiń eńbekaqysy 85 myń teńge mólsherinde sýbsıdııalanady. 2025 jyly bul baǵdarlamaǵa 487 zeınetker qatysqan.
Júrgizilip jatqan is-sharalardyń nátıjesinde Almatyda jumyssyzdyq deńgeıi 4,7%-dan 4,4%-ǵa deıin tómendedi. Bul – respýblıkalyq ortasha kórsetkishten tómen.
– Biz áleýmettik osal toptardy qoldaýǵa, ınklıýzıvti ortany damytýǵa jáne jańa jumys oryndaryn ashýǵa baǵyttalǵan júıeli áleýmettik saıasatty jalǵastyryp kelemiz. Basty maqsatymyz – árbir turǵynnyń laıyqty ómir súrýi men erteńine degen senimin arttyrý, - dedi qala ákiminiń orynbasary Nurlan Ábdirahym.
Sonymen qatar ol jastardy qoldaý baǵytynda tsıfrlyq quraldardyń belsendi engizilip jatqanyn aıtty. JOO men kolledj túlekteri «Enbek.kz» portaly arqyly onlaın-tájirıbeden ótedi, munda túıindemeler men bos jumys oryndary jarııalanyp, kelisimsharttar onlaın jasalady. Al «Skills.enbek.kz» portalynda jastarǵa arnalǵan «Mansabyńdy qur» atty onlaın-kýrs iske qosylǵan. Ol jumysqa ornalasýǵa qajetti bazalyq daǵdylardy úıretedi. Sondaı-aq «Mansap.kompasy» platformasy arqyly jastar mamandyqtar, oqý baǵdarlamalary, eńbekaqy deńgeıi jáne mansaptyq múmkindikter týraly aqparat ala alady.