Almatyda áleýmettik osal azamattarǵa qoqys shyǵarý qyzmetine jeńildikter berildi
ALMATY. KAZINFORM — Almatyda turmystyq qatty qaldyqtardy shyǵarý tarıfterine qatysty sheshim qaıta qaralyp, áleýmettik osal sanattaǵy azamattarǵa jeńildikter qarastyryldy.
Almaty prokýrasynyń málimetinshe, turmystyq qatty qaldyqtardy shyǵarý qyzmetterine aqy tóleý kezinde osal toptaǵy azamattardyń quqyǵy buzyldy.
Prokýrorlyq qadaǵalaý aktisin qaraý qorytyndysy boıynsha Almaty máslıhatynyń «Qatty turmystyq qaldyqtardy jınaý, tasymaldaý, suryptaý jáne kómý tarıfterin bekitý týraly» sheshimine azamattardyń jekelegen sanattary úshin jeńildikter qarastyratyn ózgerister engizildi.
Ekinshi dúnıejúzilik soǵystyń qatysýshylary QTQ shyǵarý qyzmetterine aqy tóleýden bosatyldy.
Al keı sanattaǵylarǵa 50% jeńildik belgilendi:
* Ekinshi dúnıejúzilik soǵystyń qatysýshylaryna teńestirilgen tulǵalar,
* birinshi toptaǵy múgedekter,
* bala kezinen múgedekter,
* múgedek balalardyń ata-analary men zańdy ókilderi,
* jetim balalar.
Ekinshi toptaǵy múgedekter men azamattardyń basqa da áleýmettik osal toptaryna 25% jeńildik qarastyrylǵan.
Jeńildikterdi rásimdeý úshin turmystyq qatty qaldyqtardy shyǵarý qyzmetin kórsetetin uıymdarǵa júginý qajet.
Eske salsaq, Pavlodar oblysynda 1 mlrd teńgelik et kombınatynyń qurylysyna prokýratýra aralasqan edi.
