Almatyda áleýmettik, medıtsınalyq jáne bilim salasy qyzmetkerleriniń jalaqysy ósedi

ALMATY. KAZINFORM — Almatyda qalalyq máslıhattyń kezekti XXVIII sessııasy ótti.

Almaty ákimdigi máslıhat depýtattarynyń aldynda 2025 jylǵa arnalǵan alǵashqy naqtylanǵan bıýdjettiń jobasyn engizdi. Ol boıynsha qala basshysynyń orynbasary Asqar Ámrın bilim berý mekemelerinde jumys isteıtin qyzmetkerlerine ústemaqy qosýdy usyndy.

Aıtýynsha, býhgalterler, kitaphanashylar, psıhologtar, logopedter, áleýmettik qyzmetkerler men tehnıkalyq qyzmetkerler, onyń ishinde eden jýýshylar jyldan jylǵa tómen jalaqy alyp keledi.

— Bul bıýdjet jobasy áleýmettik qamsyzdandyrý jáne bilim berý salasynyń ákimshilik jáne kómekshi personalyna, onyń ishinde pedagog-psıhologtarǵa, sondaı-aq vedomstvolyq baǵynysty áleýmettik mekemeler qyzmetkerlerine jalaqyny 30%-ǵa arttyrýdy kózdeıdi, — dedi Asqar Ámrın.

Sondaı-aq sessııa barysynda medıtsınalyq-áleýmettik mekemelerdiń qyzmetkerlerine ústemaqy berý máselesi talqylandy. Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov medıtsınalyq-áleýmettik mekemelerdiń qyzmetkerlerine eńbekaqy tóleý deńgeıi tómen ekenin atap ótti.

— Áleýmettik qyzmetkerlerdiń jalaqysy tómen bolǵandyqtan áleýmettik qyzmetkerler arasynan bilikti mamandardyń ketýi baıqalady. 7 jyldan 10 jylǵa deıingi ótili bar áleýmettik qyzmetkerdiń jalaqysy 240 myń teńge, uqsas ótili bar psıhologtyń jalaqysy nebári 170 myń teńge, — dedi ol.

Almaty máslıhat áleýmettik mekemeler qyzmetkerleriniń laýazymdyq jalaqylaryna 30% mólsherinde yntalandyrý ústemelerin belgileý týraly usynysty qoldady. Sonyń arqasynda 1 632 qyzmetker ústemeaqy alady.

Eske salaıyq, buǵan deıin pedagogterdiń jalaqysy sońǵy bes jylda qalaı óskenin jazǵanbyz.