Almatyda áleýmettik mańyzy bar azyq-túlik baǵasyn kótergender anyqtaldy
ALMATY. KAZINFORM – Óńirlik komıssııa Almaty bazarlarynda áleýmettik mańyzy bar azyq-túlik taýarlarynyń baǵasyn zańsyz kótergen 213 derekti anyqtady.
Megapolıste áleýmettik mańyzy bar azyq-túlik taýarlaryna qoıylatyn 15%-dyq saýda ústemesiniń saqtalýyn qamtamasyz etetin jáne deldaldarǵa tosqaýyl qoıý maqsatynda qurylǵan óńirlik komıssııa jumys isteıdi.
Onyń quramyna jergilikti, ortalyq, quqyq qorǵaý organdary (Ekonomıkalyq tergeý, Saýda, Memlekettik kiris, Básekelestikti qorǵaý jáne damytý, Tehnıkalyq retteý departamentteri, Aýmaqtyq ınspektsııasy), sondaı-aq Almaty qalasy Kásipkerler palatasynyń ókilderi kiredi.
Almaty ákimdiginiń málimetinshe, komıssııa músheleri turaqty negizde qalanyń «Túrksib», «Arystan», «Sary-Arqa», «Taý-Samaly», «Kók bazar», «Tastaq», Aq-Bulaq», «Barys-4» jáne taǵy sol sekildi negizgi azyq-túlik bazarlarynda baǵa belgileýdi baqylaý boıynsha is-sharalar ótkizip otyrady.
Atap aıtqanda, «Barys-4» bazaryn tekserý barysynda óńirlik komıssııa 54 kásipkerdiń qyzmetinde zań buzýshylyqtardy anyqtady, onyń 29-y taýardyń baǵalaryn kórsetpeı satsa, 25-i áleýmettik mańyzy bar azyq-túlik taýarlaryna qoıylatyn 15%-dyq saýda ústemesin qymbattatqan. Olar ákimshilik jaýapkershilikke tartyldy.
«Bıyl óńirlik komıssııa jumysynyń qorytyndysy boıynsha áleýmettik mańyzy bar azyq-túlik taýarlaryna qoıylatyn 15%-dyq saýda ústemesin qymbattatýdyń barlyǵy 213 jaıty anyqtaldy, 198 ákimshilik hattama jasaldy, sondaı-aq 25 tıimsiz deldal joıyldy»,- delingen habarlamada.
