Almatyda álemge áıgili rejısser Stefano Poda qoıǵan «Toska» operasynyń premerasy ótip jatyr
ASTANA. KAZINFORM — Abaı atyndaǵy Qazaq ulttyq opera jáne balet teatrynda álemge áıgili ıtalııalyq rejısser Stefano Poda qoıǵan Djakomo Pýchchınıdiń «Toska» operasynyń premeralyq kórsetilimi ótip jatyr. Bul týraly Mádenıet jáne aqparat mınıstrligi habarlady.
Qoıylymdardy QR Mádenıet jáne aqparat mınıstrliginiń, dıplomatııalyq korpýs pen zııaly qaýym ókilderi tamashalady.
Italııanyń Qazaqstandaǵy Tótenshe jáne Ókiletti Elshisi Antonello De Rıý premeraǵa jınalǵan jurtshylyqqa izgi tilegin bildirip, eki el arasyndaǵy mádenı yntymaqtastyqtyń mańyzyna toqtaldy.
- Italııanyń opera óneri zamanmen birge damyp keledi. Bılik, erkindik, adamnyń ar-namysy men qadir-qasıeti búgingi qoıylymdarǵa da arqaý bolyp otyr. Sondyqtan operaǵa tek ótkenniń murasy dep qaraýǵa bolmaıdy. Italııa men Qazaqstan osy ónerdi órkendetý jolynda birlese eńbek etýge nıetti, – dedi elshi.
Bir aı buryn Astanada Qazaqstan Respýblıkasynyń Mádenıet jáne aqparat mınıstri Arman Qyryqbaev Stefano Podamen kezdesken bolatyn. Taraptar mádenı yntymaqtastyqty damytý jáne birlesken shyǵarmashylyq jobalardy qolǵa alý jóninde pikir almasty.
Abaı atyndaǵy Qazaq ulttyq opera jáne balet teatrynyń tarıhynda alǵash ret Týrındegi Koroldik Redjo teatrymen shyǵarmashylyq áriptestik aıasynda osyndaı aýqymdy halyqaralyq joba ázirlendi.
Redjo – 1740 jyly negizi qalanǵan, Eýropadaǵy eń kóne opera teatrlarynyń biri. Buǵan deıin Italııadaǵy Redjo jáne Reseıdiń Úlken teatry sahnalarynda kórsetilgen týyndynyń jańasha sahnalyq nusqasyn endi qazaqstandyq kórermen tamashalady.
Stefano Poda rejısser ǵana emes, horeograf, stsenograf, kostıým jáne jaryq sýretshisi qyzmetterin qatar atqardy. Onyń avtorlyq tujyrymynda mýzyka, sahnadaǵy qımyl jáne zamanaýı tehnologııalar birtutas kórkemdik sheshimde úılesim tapqan. Qoıylymda 3D-proektsııalar men arnaıy Týrınde ázirlengen úsh myńnan astam elementten turatyn kostıýmder paıdalanyldy.
Basty partııalardy Abaı atyndaǵy opera jáne balet teatrynyń solısi Evgenııa Smolıanına (Florııa Toska), Nurjan Bajekenov pen Balýan Berkenov (Marıo Kavaradossı), sondaı-aq Ázerbaıjannyń halyq ártisi, Reseıdiń Úlken teatrynyń solısi Elchın Azızov (baron Skarpıa) oryndady.
Qoıýshy dırıjer – Nurjan Baıbýsınov, bas hormeıster – Álııa Temirbekova.
Djakomo Pýchchını «Toska» operasyn Vıktoren Sardýdyń dramasy negizinde Lýıdjı Illıka men Djýzeppe Djakoza jazǵan lıbrettoǵa shyǵarǵan. Oqıǵa 1800 jylǵy Rımdegi saıası oqıǵalar tóńireginde órbıdi. Týyndyda qasiretke ulasqan mahabbat, satqyndyq sekildi taqyryptar qozǵalady.
Alǵash ret 1900 jyly Rımde sahnalanǵan «Toska» álemdik mýzyka óneriniń altyn qoryna engen. Jańa qoıylym operanyń tarıhyn Qazaqstan sahnasyndaǵy jalǵastyrdy.
Aıta keteıik, Astanada Mańǵystaý oblysynyń kreatıvti jármeńkesi ótti.
