Almatyda álem onkologtary bas qosty
ALMATY. KAZINFORM — Almaty qalasynda «OnkoRenessans-2024» halyqaralyq ǵylymı-tájirıbelik konferentsııasy ótti.
Sharaǵa Japonııa, Ońtústik Koreıa, Qytaı, AQSh, Danııa, Túrkııa, Ispanııa, Mońǵolııa, Reseı, Belarýs, Ýkraına jáne álemniń basqa elderinen kelgen myńǵa jýyq onkolog, hımıoterapevt, hırýrg jáne rentgenolog qatysty. Olar onkologııalyq aýrýlardyń aldyn alý jáne emdeý máselelerin talqylap, tájirıbe almasty.
Qazaq onkologııa jáne radıologııa ǵylymı-zertteý ınstıtýtynyń dırektory Dılıara Qaıdarova, qaterli isiktiń «jasaryp» bara jatqanyn, sondyqtan erte aldyn alý óte mańyzdy ekenin atap ótti.
«Mamandar onkologııalyq aýrýlardy dıagnostıkalaý men emdeýde qoldanylatyn zamanaýı medıtsınalyq tehnologııalar, súıek jáne jumsaq tinderdiń sarkomasy, bas jáne moıyn isikteri, gınekologııalyq qaterli isik, asqazan-ishek joldarynyń isikteri, jáne qaterli isikterdiń damýy men evolıýtsııasyndaǵy ǵylymı jańalyqtar, emdeýdiń zamanaýı jetistikteri jáne onkologııadaǵy menedjment jaıly oı qozǵady. Sút beziniń qaterli isigi, jatyr moıny obyry jas qyz-kelinshekterdiń arasynda jıi kezdesedi. Al V jáne S gepatıti vırýstary baýyr obyryna ákeledi. Sondyqtan, árıne, jyl saıyn arnaıy skrıngten ótip turý mańyzdy», — dedi «Qazaq onkologııa jáne radıologııa ǵylymı-zertteý ınstıtýty» AQ basqarma tóraıymy, Qazaqstan onkologtary qaýymdastyǵynyń prezıdenti Dılıara Qaıdarova.
Aıtýynsha, elde qaterli isikke shaldyqqandardyń 60 protsentke jýyǵy reprodýktıvti jastaǵy adamdar. Bul 15 pen 49 jas aralyǵyndaǵy erler men áıelder.
Konferentsııa aıasynda sheteldik tálimgerlerdiń qatysýymen bas jáne moıyn qaterli isigi, uıqy bezi obyry, jatyr moıny obyry boıynsha operatsııalar — tikeleı efırde sheberlik saǵattar ótkizildi.
Aıta keteıik, qyrkúıek aıynyń ortasynda Qazaqstanda jatyr moıny obyrynyń negizgi qozdyrǵyshy — adam papılloma vırýsyna (APV) qarsy qyzdardy jalpy vaktsınalaý bastaldy.
Budan bólek, Densaýlyq saqtaý mınıstrliginiń uıytqy bolýymen elimizde APV-ǵa qarsy vaktsınatsııasynyń qoǵamdyq densaýlyqqa áseri boıynsha zertteý júrip jatyr.
