Almatyda alaıaqtyqpen paıda kórmek bolǵan merdigerge 900 mln teńgeniń jumysy júkteldi
ALMATY. KAZINFORM – Almaty qalasynda sorǵy stantsııasy bar sý qubyry men káriz taratý jelilerin salý jumystarynyń qunyn kótermelegen merdiger óz esebinen 900 mln teńgege qosymsha jumystardy oryndaıtyn bolady.
Eske sala keteıik, ońtústik megapolıstiń Energetıka jáne sýmen jabdyqtaý basqarmasy quny 9,1 mlrd teńge bolatyn jobany iske asyrýda. Bul qarajatty jobalaýshy «QazaqSantehproekt» JShS jobalyq-smetalyq qujattamany jasaý kezinde qurylys materıaldaryn tasymaldaý jáne satyp alý shyǵyndarynyń qunyn arttyrý jolymen urlaý úshin alǵysharttar jasaǵan.
Qarjylyq monıtorıng agenttigi tekserisiniń nátıjesinde topyraq tasymaldaý araqashyqtyǵy jobada kózdelgennen 30 km jaqyn ekendigi anyqtaldy.
«Budan basqa, qoldanylatyn qurylysmaterıalynyń kólemi 1,5 myń tonnaǵa artyq jobalanǵan.
Baǵany asyra kórsetý faktisi anyqtalǵan kezde obektiniń daıyndyǵy 93% qurady, ıaǵnı 9,1 mlrd teńgeniń 8,4 mlrd teńgesi ıgerilgen.
Osyǵan baılanysty, QMA bastamasy boıynsha Almaty qalasynyń ákimdigi «SapaQurylys 2007» JShS bas merdigerine jobada kózdelmegen jumystardyń kólemin 900 mln teńgege ulǵaıtty (qosymsha 500 abonent qosý, qudyqtar ornatý jáne t. b.)», — dep jazdy vedomstvodan.
Bul jumys áleýmettik ınfraqurylymdy damytý protsesine qatysýshylar tarapynan urlyqtyń aldyn alýǵa jáne olardy qylmystyq jáne sot talqylaýlarynyń orbıtasyna tartýdan qorǵaýǵa baǵyttalǵan.
