Almatyda alaıaqtarǵa aldanǵan turǵyndarǵa 700 mln teńgege jýyq qarjy qaıtaryldy

ALMATY. KAZINFORM – Almatyda ınternet-alaıaqtyqqa qatysty 2,5 myńnan astam qylmys tirkelip, japa shekken azamattarǵa 700 mln teńgedeı qarjy qaıtaryldy.

Almaty polıtsııa departamenti Kıberqylmysqa qarsy is-qımyl basqarmasy bastyǵynyń orynbasary Erkebulan Qoıshybaevtyń aıtýynsha, jalǵan saıt pen ınternet-dúken ashyp, onlaın mámile kezindegi aldap, «jumys» nemese «ınvestıtsııa» degen jeleýmen azamattardy osyndaı jolmen aqsha tabýǵa tartyp, bank pen qaýipsizdik qyzmetiniń ókili bolyp qońyraý shalý kóp kezdesedi eken.

Mundaı qylmystarǵa qarsy is-qımyl jasaý úshin «Kıbernadzor» aqparattyq júıesi qoldanylady. Onyń kómegimen zııandy kontenti bar resýrstardy qosa alǵanda, 17,6 myńnan astam osyndaı saıt pen silteme buǵattalǵan.

Sondaı-aq bankomattardyń mańyna polıtsııa qyzmetkeriniń 355 maketi ornalastyryldy. 470 banner ornatylyp, 1 400-den astam beınerolık daıarlandy. 3 400-den astam profılaktıkalyq aktsııa men ártúrli salada 3 400-den astam dáris ótkizildi, shamamen 160 myń jadynama men paraqsha taratyldy. 90 myńnan astam messendjer-chatta beınerolıkter shyqty.

– Internet-alaıaqtyqpen kúresý polıtsııanyń ǵana jumysy emes, onymen ár adam kúresýi kerek, saqtanýy kerek. Kodty, paroldi, kartadaǵy derekti eshkimge aıtpańyz, kúmándi siltemelerge jolamańyz. Kúmán týsa, birden polıtsııaǵa, bankke júgingen jón, – dep eskertti Erkebulan Qoıshybaev.

Eske salaıyq, buǵan deıin Almaty oblysynda ınternet-alaıaqtyq qurbandaryna 18 mln teńge qaıtarylǵanyn jazǵanbyz.