Almatyda alaıaqtar nómir aýystyrýǵa paıdalanatyn Sim-Box jabdyǵy tárkilendi

ASTANA. KAZINFORM – Almatyda quqyq qorǵaý organdary, «Qazaqtelekom» AQ jáne «Ksell» AQ arasyndaǵy memorandým aıasynda qala prokýratýrasynyń úılestirýimen polıtsııa qylmystyq tehnıka paıdalaný faktisin áshkereledi.

Almaty qalasy PD Kıberqylmyspen kúres basqarmasynyń qyzmetkerleri Báıterekov kóshesindegi páterden Reseı Federatsııasynyń 18 jastaǵy azamatyna tıesili «Sim-Box» qurylǵysyn, qazaqstandyq uıaly baılanys operatorlarynyń 300-den astam SIM-kartasyn jáne ózge de jabdyqtardy tárkiledi.

«Sim-Box» qylmystyq maqsatta telefon qońyraýlaryn jappaı jasaý, habarlamalar taratý jáne abonenttik nómirlerdi aýystyrý úshin qoldanylady.

- Atalǵan derek boıynsha QR QK-niń 213-baby (Abonenttik qurylǵynyń sáıkestendirý kodyn ózgertýge arnalǵan baǵdarlamalardy quqyqqa syıymsyz paıdalaný) boıynsha sotqa deıingi tergep-tekserý bastaldy. Bul bapta 5 jylǵa deıin bas bostandyǵynan aıyrý jazasy kózdelgen, - delingen Bas prokýratýranyń dereginde.

Bıyl osyndaı 7 is sotqa joldanyp, onyń 4-i boıynsha úkim shyǵarylǵan.

Almaty qalasynyń prokýratýrasy azamattardy abaı bolýǵa, bank kartasy derekteri men kirý kodtaryn bógde adamdarǵa bermeýge shaqyrady. Mundaı jabdyqty paıdalaný múmkindigi týraly aqparat bolǵan jaǵdaıda quqyq qorǵaý organdaryna habarlaý qajet.

Aıta keteıik, bıyl elimizde 88 myńnan astam tirkelmegen SIM-karta tárkilendi.