Almatyda «Alataý» tennıs ortalyǵy paıdalanýǵa berildi
ALMATY. KAZINFORM – Almaty qalasynda zamanaýı «Alataý» tennıs ortalyǵy ashyldy
Jańadan ashylǵan «Alataý» kesheni - Almatydaǵy iri tennıs ortalyǵy.
Atalmysh nysan qalanyń sporttyq ınfraqurylymynyń deńgeıin kóterip qana qoımaı, sonymen qatar kásibı tennısshilerdi daıarlaý, halyqaralyq týrnırlerdi ótkizip, jastardy sportqa tartý úshin jańa múmkindikter ashady.
Ortalyq kásibı tennısshiler men barlyq jastaǵy áýesqoılar jattyǵýyn, sondaı-aq túrli deńgeı men sanattaǵy týrnırlerdi ótkizýge baǵyttalǵan. Oqytý úderisine bilikti bapkerler tartylǵan.
Ortalyqtyń ashylý rásimine Almaty qalasynyń ákimi Darhan Satybaldy, Qazaqstan tennıs federatsııasynyń prezıdenti Bolat Ótemuratov, sondaı-aq kásibı tennısshiler, Almaty Arena stadıonynda 11-19 qazan aralyǵynda ótip jatqan Almaty Open ATR 250 týrnırine kelgen Danııl Medvedev, Karen Hachanov, Aleksandr Shevchenko, Beıbit Juqaev jáne Flavıo Kobollı qatysty. Tennısshiler balalarmen sheberlik saǵatyn ótkizip, jańa tennıs ortalyǵy aýmaǵynda aǵash otyrǵyzdy.
- Jańa tennıs ortalyǵy bizdiń qalamyzdyń damyp jatqan aýdany úshin mańyzdy sport nysany boldy. Ol jas sportshylardy daıarlaıtyn, sondaı-aq ulttyq jáne halyqaralyq jarystardy ótkizetin alańǵa aınalady. Bul Almatynyń álemdik sporttyq qaýymdastyq aldyndaǵy bedelin kóterip qana qoımaı, qalamyzdyń odan ári damýyna septesedi, - dedi Almaty ákimi Darhan Satybaldy.
Nysan Qazaqstan tennıs federatsııasynyń qoldaýymen paıdalanýǵa berildi.
Jańa tennıs ortalyǵy ońtústik astananyń halyq kóp qonystanǵan Alataý aýdanynda ornalasqan. Zamanaýı ınfraqurylymmen qamtamasyz etilgen ortalyq halyqaralyq talaptarǵa saı keledi.
Qazaqstan tennıs federatsııasynyń prezıdenti Bolat Ótemuratov «Alataý» tennıs ortalyǵynyń mańyzdylyǵyn atap ótti.
- Infraqurylymǵa quıylǵan ınvestıtsııa tennısti kóptegen qazaqstandyqtar úshin qoljetimdi sport túri etýge járdemdesedi. "Alataý” tennıs ortalyǵy – álemdik deńgeıdegi talaptardyń arqasynda sporttyń buqaralyq sıpat alýynyń aıqyn kórinisi. Kúni búgin Qazaqstanda 30 myńnan astam bala tennıspen turaqty jattyǵady. Osy sport túrimen aınalysýshylar qataryn kóbeıtip, qazaqstandyqtar arasynda salaýatty ómir saltyn ornyqtyrý – federatsııanyń strategııalyq maqsattarynyń biri, - dedi ol.
Eske sala keteıik, budan buryn «Qaırat» - «Pafos» matchynyń bıleti satylymǵa shyqqanyn jazǵan edik.