Almatyda Alataý dańǵyly Jandosov kóshesine deıin uzartylady
ALMATY. KAZINFORM – Almatyda keıingi jyldary mańyzdylyǵy artqan qalanyń batys bóligindegi Alataý dańǵylyn uzartý josparlanyp otyr.
Búginde Alataý dańǵyly Raıymbek batyr dańǵylynan Beljaılaý kóshesine deıin sozylyp jatyr. Endi qala ákimdigi bul joldy Beljaılaý kóshesinen Jandosov kóshesine deıin uzartýdy josparlap otyr. Ol úshin jobalaý-smetalyq qujattamasyn ázirleý jumystary bastaldy. Tıisti lot memlekettik satyp alý portalynda ornalastyrylǵan.
Tapsyrys berýshi – Almaty qalasy Jol ınfraqurylymyn damytý basqarmasy. «Alataý dańǵylyn» Beljaılaý kóshesinen Jandosov kóshesine deıin uzartýǵa jobalaý-smetalyq qujattamasyn ázirleý» jobasynyń tehnıkalyq erekshelikterine sáıkes, jeńimpaz keshendi ınjenerlik-tehnıkalyq izdestirýler: topografııalyq-geodezııalyq, ınjenerlik-geologııalyq jáne gıdrologııalyq jumystar júrgizýi tıis. Sondaı-aq qurylys aýmaǵyndaǵy jasyl jelekterge ormanpatologııalyq zertteýler júrgizý, trassanyń josparyn, kóldeneń jáne boılyq beıinderin jasaý, jaryqtandyrý júıeleri, jaıaý júrginshiler joldary men arnaıy ótkelderin qarastyrý, tehnıkalyq talaptarǵa saı kelmeıtin jelilerdi menshik ıelerimen kelise otyryp qaıta qurý qajet.
Lot jeńimpazy anyqtalǵan, ol – «Kazdorınnovatsııa» ǵylymı-zertteý jáne óndiristik kompanııasy» JShS. Bul jumystarǵa 244 mln teńge bólindi.
Eske salaıyq, Alataý dańǵyly Abaı dańǵyly, Tóle bı kóshesi jáne Raıymbek batyr dańǵyly syndy qalanyń negizgi magıstraldy kóshelerimen qıylysady. Munda kóptegen turǵyn úı keshenderi men áleýmettik nysandar ornalasqan. Aldaǵy jyldary Alataý dańǵylynyń boıynda metronyń birinshi jelisiniń úsh aıaldamasy salynýy tıis. Sonymen qatar Alataý jáne Raıymbek batyr dańǵyldarynyń qıylysynda «Barlyq» kólik toraby bolady.
Buǵan deıin Almaty ákimi Barlyq bazaryna deıingi metro jelisiniń qurylysy bastalǵanyn habarlady.
