Almatyda áli toza qoımaǵan tósenish tas nege jańasyna aýystyrylyp jatyr
ALMATY. KAZINFORM — Búginde Almatynyń Abaı dańǵylynda jóndeý jumystary júrgizilip jatyr.
Turǵyndar tarapynan jaıaý júrginshiler jolynan alynyp jatqan tósenish tasqa qatysty suraqtar kóbeıdi. Jeli qoldanýshylarynyń jazýynsha, qalanyń negizgi kósheleriniń birinen jaǵdaıy jaqsy tósenish tastardy aýystyrýdyń esh qajeti bolmaǵan.
Bul suraqtarǵa Almatynyń qoǵamdyq keńistikterdi damytý basqarmasy jaýap berdi. Vedomstvo málimetinshe, qazir Abaı dańǵylynyń Dostyq dańǵylynan Rozybakıev kóshesine deıingi bóliginde «qasbetten qasbetke deıin» qaǵıdaty boıynsha keshendi abattandyrý jobasy júzege asyrylyp jatyr. Joba aıasynda trotýarlardyń tósenish tastaryn tózimdirek granıt jabynǵa aýystyrý kózdelgen.
— Joba sheńberinde aýmaqty kógaldandyrý, atap aıtqanda: iri aǵashtar, butalar men gúl kompozıtsııalaryn otyrǵyzý, avtomatty sýarý júıesin ornatý, syrtqy jaryqtandyrý men shaǵyn arhıtektýralyq formalardy jańartý, sondaı-aq jaıaý júrginshiler ınfraqurylymy men abattandyrý elementterin zamanaýı standarttarǵa sáıkestendirý jumystary qarastyrylǵan, — dep habarlady basqarmadan.
Sonymen qatar vedomstvo ókilderi kósheden alynǵan ári qaıta paıdalanýǵa jaramdy tósenish tastardyń joıylmaıtynyn atap ótti. Materıal Almatynyń aýdandyq ákimdikterine qosalqy kósheler men aýla aýmaqtarynda qaıta paıdalaný úshin berilmek.
Eske salaıyq, Almatyda kóshedegi jaramdy tósenish tastardy aýystyrýǵa baılanysty suraq pen shaǵym jyl saıyn týyndaıdy. Máselen, birneshe jyl buryn Panfılov kóshesindegi jańa tósenish tastardyń aýystyrylyp jatqany turǵyndardyń narazylyǵyn týdyrǵan edi.
Al bıyl 28 panfılovshy saıabaǵynyń buryn jóndelgen tósenish tastarynyń qaıtadan aýystyrylýyna baılanysty suraqtar týyndady.
