Almatyda Ál-Farabı dańǵylynyń boıynda jańa sport saıabaǵy bolady
ALMATY. KAZINFORM — Ál-Farabı dańǵyly jáne Dýlatı kósheleriniń qıylysynda zamanaýı FLOW Park sport saıabaǵynyń qurylysy bastaldy.
Almaty qalasynyń Qoǵamdyq keńistikterdi damytý basqarmasynyń málimetinshe, joba jeke ınvestorlar qoldaýymen júzege asyrylady. Qurylysqa 3 mlrd teńge qarjy quıylǵan. Saıabaq qurylysy tek demeýshilik qarajat esebinen júrgiziledi, buǵan memlekettik bıýdjetten qarjy bólinbeıdi.
— FLOW saıabaǵy qala turǵyndary men qonaqtary úshin salaýatty ómir saltyn ustanyp, sportpen aınalysýǵa jáne belsendi demalysqa arnalǵan jańa demalys orynǵa aınalmaq. Bolashaq saıabaq aýmaǵynda velosıped jáne jaıaý júgirý jolaqtary, ashyq aspan astyndaǵy jattyǵý qurylǵylary, oıyn jáne sport alańdary, sondaı-aq, tynyǵýǵa jáne sergitýge arnalǵan aımaqtar ornalastyrylady, — dep habarlady basqarmadan.
Eske salaıyq, buǵan deıin Almatyda Pýshkın kóshesiniń bóligi jaıaý júrginshiler alleıasyna aınalatynyn jazǵanbyz.