Almatyda ál-aýqaty tómen 100 myńǵa jýyq turǵyn MÁMS júıesine qosyldy
ALMATY. KAZINFORM – Bıyl Almatyda buryn saqtandyrylmaǵan 99 myńnan astam turǵyn mindetti áleýmettik medıtsınalyq saqtandyrý arqyly kórsetiletin qyzmetterge qol jetkizdi.
Medıtsınalyq saqtandyrý qory Almaty qalalyq fılıalynyń dırektory Іlııas Muhamedjannyń aıtýynsha, 2026 jyldan bastap MÁMS týraly zańǵa engizilgen ózgerister kúshine endi. Bul túzetýler áleýmettik ál-aýqaty tómen sanattaǵy azamattardy qamtýǵa baǵyttalǵan. Endi olar úshin MÁMS jarnasyn jergilikti ákimdikter tóleıdi.
- Buǵan deıin jergilikti atqarý organdary azamattardyń áleýmettik portretin anyqtaý boıynsha aýqymdy jumys júrgizgen bolatyn. Olardyń arasynda qıyn jaǵdaıǵa tap bolǵan, tabysy tómen tulǵalar anyqtaldy. Olardyń medıtsınalyq kómekke tolyqqandy júginýge múmkindigi bolmaǵan. Búgingi tańda osyndaı qıyn jaǵdaıǵa tap bolǵan 99 myń almatylyq avtomatty túrde saqtandyryldy, - dedi fılıal basshysy.
Endi atalǵan sanattaǵy azamattar qajet bolǵan jaǵdaıda MÁMS arqyly medıtsınalyq kómekti paıdalaný úshin emhanaǵa júgine alady. Olar emhanaǵa qaralǵan sátten bastap ákimdik Medıtsınalyq saqtandyrý qoryna aı saıyn ár adam úshin 9 189 teńge kóleminde jarna aýdara bastaıdy.
MÁMS júıesinde statýsty tómendegi servıster arqyly tekserýge bolady:
• msqory.kz
• Qoldau 24/7 mobıldi qosymshasy
• Damumed qosymshasy
• Ekinshi deńgeıdegi bankterdiń (EDB) mobıldi qosymshalary
• @Saqtandyrubot telegramm-boty
Eske salaıyq, elde MÁMS aıasyndaǵy qyzmet kórsetýshilerge jańa talaptar engiziledi.
