Almatyda aqsha bopsalaǵan blogerler eki aıǵa qamaldy
ALMATY. KAZINFORM — Almatyda aqsha bopsalaǵan eki bloger qamaýǵa alyndy.
— Bopsalaý faktisi boıynsha ustalǵan kúdikti blogerler sot sanktsııasymen eki aıǵa qamaldy, — delingen Almaty qalasy polıtsııa departamenti baspasóz qyzmetiniń habarlamasynda.
Osyǵan deıin Polıtsııa qyzmetkerleri jábirlenýshiniń aryzy boıynsha kásipker men eki blogerdi ustaǵan bolatyn.
Aıta keteıik, kúdiktiler áleýmettik jelilerde kompromattar jarııalaımyz dep qoqan-loqqy kórsetip, 8 mln teńge bopsalaǵan.
Sondaı-aq olar jábirlenýshini sot sheshimimen kásipker tóleýge mindettelgen 20 mln teńgeni talap etýden bas tartýǵa kóndirmek bolǵan. Kúdiktiler 10 mln teńge alyp jatqan jerinen ustaldy.
Eske salaıyq, buǵan deıin jetisýlyq blogerdiń de kásipkerden aqsha bopsalaǵany týraly jazǵan edik.