Almatyda «Aqsaı» stantsııasy iske qosyldy: aýyz sý máselesi qanshalyqty sheshildi
ALMATY. KAZINFORM — Almatyda «Aqsaı» sý tartý stantsııasy qurylysy aıaqtaldy. Nysan qashan jobalyq qýatyna shyǵyp, turǵyndardy aýyz sýmen tolyq qamtamasyz etetinin Kazinform tilshisi anyqtap kórdi.
Jańa nysan jumysyn bastap ketti. Alaıda baptaý-iske qosý jumystary aıaqtalǵan soń, ol tolyq qýatyna shyǵady. Aldaǵy ýaqytta Almaty qalasy Naýryzbaı aýdanynyń batys bóligi men Almaty oblysy Qarasaı aýdanynyń turǵyndaryn — jalpy 150 myńǵa jýyq adamdy sýmen qamtamasyz etpek.
Sý tartý kesheniniń jobalyq qýaty — táýligine 22 myń tekshe metr aýyz sý berýge eseptelgen. Bastapqy jospar boıynsha nysan 2025 jyldyń qarasha aıynda iske qosylýy tıis edi. Degenmen, is júzinde sý berý kezeń-kezeńmen 2026 jyldyń mamyr aıynda bastaldy.
Energetıka jáne sýmen qamtamasyz etý basqarmasy basshysynyń orynbasary m. a. Temirlan Japarbektiń aıtýynsha, barlyq qurylys-montaj jumystary qazir tolyq aıaqtalǵan. Keshenniń barlyq negizgi qurylystary boı kóterip, tehnologılyq qondyrǵylar tolyq ornatylǵan.
Aýyzsý qalaı tazalanady
Búginde nysanda «Almaty Sý» kásipornymen birlesip jer ústi kózinen únemi sý tartý jumystary júrgizilip jatyr. Odan ári sý uzyndyǵy 5,9 shaqyrym bolatyn magıstraldy qubyr arqyly tazartý stantsııasyna sý túsip, onda tolyq tazartý tsıklinen ótedi. Mamandar tehnologııalyq rezervýarlardy toltyryp, búkil júıeni baqylaý maqsatynda dezınfektsııadan ótkizedi.
Qoldanystaǵy bekitilgen normalarǵa sáıkes, baptaý-iske qosý jumystarynyń uzaqtyǵy qurylys aıaqtalǵannan keıin 5 aıǵa jalǵasady. Olar tolyq aıaqtalǵan soń, nysan paıdalanýshy uıymǵa resmı túrde tapsyrylady. Energetıka jáne sýmen qamtamasyz etý basqarmasynyń ókilderi jobanyń bekitilgen kestege saı júzege asyrylyp jatqanyn jáne jumystardy oryndaý merzimi keıinge shegerilmegenin atap ótti.
Turǵyndar qazir qansha sý alyp otyr
Búginde «Aqsaı» sý tartý stantsııasy men sý tazartý stantsııasy arqyly tutynýshylarǵa saǵatyna 200-den 600 tekshe metrge deıin tazartylǵan sý berilip jatyr. Beriletin sý kólemi ázirge naqty mólsherde emes. Óıtkeni mamandar qurylǵylardyń eń ońtaıly jumys rejımin tańdaý úshin jumys istep jatyr.
Baptaý jumystary barysynda sýdyń sapasyna, sonyń ishinde onyń laılylyq deńgeıine qaraı reagentter men flokýlıanttardyń qajetti mólsheri anyqtalady. Barlyq synaq aıaqtalǵannan keıin stantsııa táýligine 22 myń tekshe metr aýyz sý beretin bolady.
Jobanyń quny
Buǵan deıin «Aqsaı» sý qabyldaý qurylysynyń quny 29,7 mlrd teńge bolǵany habarlandy.
Eske salaıyq, jyl saıyn Almatyda sý tutyný kóbeıetin ýaqytta sý tapshylyǵy baıqalyp keledi. Al 2040 jylǵa qaraı megapolıs halqynyń sany 3,6 mln adamǵa deıin ósýi múmkin. Osy máseleni sheshý úshin qalada jańa sý qabyldaý qurylystaryn salý jobalary júzege asyrylyp jatyr.
