Almatyda aqpan aıynda 600-den astam avtokólik ekologııalyq normany buzǵan
ALMATY. KAZINFORM – Almatyda avtokólikterdi tekserý barysynda júzdegen kóliktiń ekologııalyq talapty buzǵany anyqtaldy.
Almaty ekologııa jáne qorshaǵan orta basqarmasynyń habarlaýynsha, tekseristi Eco Almaty JShS men «Renessans Plıýs» JShS mamandary qalalyq polıtsııa departamentiniń qyzmetkerlerimen birlesip júrgizildi.
– 25 aqpanda jyljymaly ekologııalyq zerthanalar ál-Farabı dańǵyly men Dýlatı kóshesiniń qıylysynda, Raıymbek dańǵyly men Jetisý kóshesinde, І. Jansúgirov kóshesinde jáne Qulja traktisinde 42 avtokólikti tekserdi. Benzın qozǵaltqyshy bar 12 kólikte shyǵaryndylardyń belgilengen normadan asýy anyqtaldy. Atalǵan kólik ıelerine QR «Ákimshilik quqyq buzýshylyq týraly» kodeksiniń 334-baby boıynsha aıyppul salyndy. Dızel qozǵaltqyshy bar avtokólikter arasynda buzýshylyq tirkelgen joq, - delingen basqarma taratqan habarlamada.
Buǵan deıin, 12-19 aqpan aralyǵynda statsıonarlyq ekologııalyq beketterde paıdalanylǵan gazdardyń quramyndaǵy zııandy zattar men tútin mólsherine 4 012 ólsheý júrgizildi. Onyń ishinde 3 996 tekseris benzın qozǵaltqyshtary bar kólikterge, 16 tekseris dızeldi kólikterge qatysty boldy. Monıtorıng qorytyndysy boıynsha 602 avtokólikte belgilengen normalardyń asýy anyqtaldy, bul tekserilgen kólikterdiń jalpy sanynyń 15%-y. 593 jaǵdaıda artyq shyǵaryndylar kómirtegi totyǵy (SO) boıynsha, 9 jaǵdaıda tútin kórsetkishi boıynsha tirkeldi.
Eske salaıyq, buǵan deıin Almatydaǵy tekseris kezinde ár ekinshi kólik ekologııalyq normany buzǵany anyqtalǵanyn jazǵan edik.
