Almatyda aqyly joldy jeńildikpen tóleýdi usynatyn jalǵan SMS-habarlamalar jiberilgen
ALMATY. KAZINFORM – Úlken Almaty avtomobıl aınalma jolyn (ÚAAAJ) basqarýshy kompanııa júrgizýshilerge eskertý jasady.
Kompanııa málimetinshe, belgisiz nómirlerden ÚAAAJ jolymen júrý aqysyn bógde siltemeler arqyly jeńildikpen tóleýdi usynatyn SMS-habarlamalar jiberý jaǵdaılary tirkelgen.
- Mundaı habarlamalar alaıaqtyq sıpatqa ıe ekenin eske salamyz. Óz qaýipsizdigińiz úshin SMS-habarlamalar arqyly kelgen kúmándi siltemelerge ótpeńiz. Jol júrý aqysyn belgisiz nemese bógde resýrstar arqyly tólemeńiz. Mundaı siltemeler arqyly bank derekterińizdi jáne basqa da jeke aqparatyńyzdy bermeńiz, - dep habarlady BAKAD.
ÚAAAJ júrý aqysyn jeke tulǵalar Kaspi Bank, Halyk Bank jáne Bank CenterCredit onlaın-bankıng qosymshalary arqyly «Tólemder» bólimindegi «BAKAD. Jol júrý aqysyn tóleý» qyzmeti arqyly júzege asyra alady. Bank qosymshalary qoljetimsiz bolǵan jaǵdaıda, tólemdi myna tásilder arqyly jasaýǵa bolady:
* Visa jáne Mastercard bank kartalaryn paıdalana otyryp, https://webportal.barr.kz/login/ resmı veb-portaly arqyly;
* Qiwi-ámııan arqyly.
Kásipkerlik sýbektileri (jeke jáne zańdy tulǵalar) úshin tólem derbes shotty tolyqtyrý úshin Operatordyń esep aıyrysý shotyna banktik aýdarym jasaý arqyly júzege asyrylady.
Eske salaıyq, bıyl tamyz aıynda Úlken Almaty aınalma jolynda tólem jasaý tártibi ózgerdi.
