Almatyda aqyly avtoturaqtar sany artady

ALMATY. KAZINFORM – Almatyda zamanaýı ári yńǵaıly avtoturaq júıesin qurý boıynsha jumys júrgizilmek. 

Almaty ákimdiginiń málimetinshe, qazir qalada 18 myńnan astam turaq orny bar. Al jyl sońyna qaraı olardyń sanyn 30 myńǵa deıin arttyrý josparlanyp otyr.

– Aqyly avtoturaq kólik qozǵalysyn baqylaýǵa jáne júrgizýshilerdi ereje saqtaýǵa yntalandyrady. Almatyda kólik sanynyń kóbeıýine qaraı bul mańyzdy shara. Joba turaq oryndaryn ońtaılandyrýǵa jáne qozǵalysty jaqsartýǵa baǵyttalǵan. Aqyly turaqtar engizý kezdeısoq qoıylǵan kólik sanyn azaıtady. Sondaı-aq múmkindigi shekteýli jandar úshin arnaıy turaq qarastyrylady, - dedi «Almaty Parkıng» mekemesi dırektorynyń orynbasary Talant Taınov.

Sondaı-aq qala ákimdigi Almaly, Áýezov, Bostandyq jáne Medeý aýdandaryndaǵy kólik kóp júretin kóshelerdiń boıynda trotýar úlgisindegi jańa avtoturaqtar ashylǵanyn atap ótti.

– Munda jaqyn mańda turatyn jandardyń jaılylyǵyna erekshe nazar aýdarylady. Turaq 08:00-den 19:00-ge deıin ǵana aqyly, al keshki jáne túngi ýaqytta tegin. Sonymen qatar, qazirgi ýaqytta turǵyndar úshin aı saıynǵy abonementti engizý máselesi pysyqtalyp jatyr. ıAǵnı, jeńil tarıfti rezıdenttik kelisim qarastyrylýda, - dep habarlady ákimdikten.

Resmı málimdemege sáıkes, avtoturaq aýmaǵyn keńeıtý – qalanyń ortalyq aýdandaryndaǵy keptelisti azaıtý jónindegi keshendi baǵdarlamanyń bir bóligi. Qajetti belgilerdi ornatý, belgileý jáne aqparattyq taqtaıshalardy montajdaý boıynsha barlyq jumys kezeń-kezeńimen júrgiziledi.

Eske salaıyq, buǵan deıin Almatyda avtoturaq sanynyń kóbeıýi keptelis máselesine qanshalyqty áser etetini týraly sarapshylar pikirin bildik.