Almatyda aqyly avtoturaqqa abonement engizilýi múmkin
ALMATY. KAZINFORM - Almatyda jaqyn mańdaǵy úılerdiń turǵyndary úshin aqyly turaqqa abonement engizý máselesi qarastyrylyp jatyr.
Qalalyq mobıldilik basqarmasynan atap ótkendeı, turaq keńistigin damytý jospary búkil qala úshin biryńǵaı turaq tıpologııasyn jáne ashyq tarıftik júıeni engizýdi kózdeıdi.
Halyqaralyq tájirıbege sáıkes «Almaty parkıng» kommýnaldyq kásiporny jaqyn mańdaǵy úılerdiń turǵyndary úshin abonementti engizý tetigin ázirlep jatyr.
«Jergilikti turǵyndar basymdyqqa ıe bolady, olar úshin turaq oryndaryn qaıta uıymdastyrý, ásirese Almaty ortalyǵynyń rezıdentterine taptyrmas nárse. Jergilikti turǵyndar arnaıy ruqsat alady. Avtokólikti avtoturaq aımaǵynda (úıdiń aınalasyndaǵy birneshe blok) abonement boıynsha qoıýǵa bolady. Abonement satyp alǵan avtokólik júrgizýshisi turaqqa saǵattyq tólem tólemeıdi», - dedi «Almaty parkıng» basshysy Vladımır Nı.
Onyń aıtýynsha, jeńildikti sanattarǵa jatatyn adamdar úshin arnaıy rejım qarastyrylady.
Atap aıtqanda, Ekinshi dúnıejúzilik soǵysyna qatysýshylary men múgedekteri, basqa memleket aýmaǵyndaǵy urys qımyldarynyń ardagerleri, I jáne II toptaǵy múgedekter, Semeı ıadrolyq polıgonyndaǵy synaqtar saldarynan zardap shekken múgedek balanyń zańdy ókilderi, kópbalaly analar, sondaı-aq qyzmettik mindetin atqaryp júrgen memlekettik avtokólik júrgizýshileri.
«Olar tegin turaqqa ruqsat alady dep josparlanyp otyr. Sonymen qatar, mototsıklder men elektromobılderdiń ıeleri úshin 50 paıyzdyq jeńildik qarastyrylǵan», - dedi Vladımır Nı.
Aldyn ala jospar boıynsha abonement 3, 6 nemese 12 aıǵa arnalady. Bıyl tamyz-qyrkúıek aıynda engiziledi dep boljanyp otyr.
Aıta ketetin nárse, aqyly avtoturaq pen aıyppuldan túsetin túsimder kólik júıesin damytýǵa jáne qoǵamdyq keńistikterdi abattandyrýǵa baǵyttalady.
Eske salaıyq, 2022 jyly Almatydaǵy aqyly avtoturaqtar qalanyń menshigine qaıtarylǵan bolatyn.
Keıin «Almaty parkınginde» biryńǵaı operatory qurylyp, kásiporyn dırektory taǵaıyndaldy.
Al, 2023 jyldyń 15 shildesinen bastap A-Parking operatory aqyly avtoturaqtarǵa qyzmet kórsetýdi toqtatty. Sondaı-aq, sol jyldyń qyrkúıek aıynda Almatyda avtoturaq baǵasy kóteriletini aıtyldy.
Osylaısha, byltyr 11 qyrkúıekten bastap Almatyda avtoturaqtarǵa aqy tóleý júıesi qaıta iske qosylady. Bir saǵattyń quny – 100 teńge.
