Almatyda aqyldy tehnologııalarǵa arnalǵan Qazaqstan-Qytaı halyqaralyq kórmesi óz jumysyn bastady
ALMATY. KAZINFORM — Almatyda 2 shildede Qazaqstan-Qytaıdyń aqyldy tehnologııalar men zamanaýı ómir saltyna arnalǵan XXI halyqaralyq kórmesi óz jumysyn bastady. Іs-shara aıasynda forým ótip, Qazaqstan men Qytaı kásipkerleri arasynda B2B formatyndaǵy iskerlik kezdesýler uıymdastyryldy.
Jalpy aýmaǵy 10 myń sharshy metr bolatyn kórme alańynda 500-ge jýyq stend ornalastyrylǵan. Kórmege Qytaıdyń túrli provıntsııalary, avtonomııalyq óńirleri men iri qalalarynan kelgen 400-ge jýyq kásiporyn qatysyp jatyr.
Olardyń qatarynda Beıjiń, Tszılın, Chjetszıan, Fýtszıan, Tszıansı, Shandýn, Henan, Gýandýn, Sychýan, Shensı, Gansý jáne Shyńjań óńirleriniń kompanııalary bar. Sonymen qatar kórmege Shyńjań óndiristik-qurylys korpýsynyń delegatsııasy da qatysyp otyr.
Qazaqstan tarapynan kórmege 100-den astam iri kásipker men bıznes ókilderi barǵan. Sondaı-aq kórmege Ózbekstan, Túrikmenstan, Qyrǵyzstan, Tájikstan jáne Ázerbaıjannan delegatsııalar qatysyp, qytaılyq kompanııalarmen iskerlik baılanys ornatýǵa múmkindik aldy.
Kórmeniń mańyzdy bólimderiniń biri apattyq-qutqarý jáne taý-ken salasyna arnalǵan zamanaýı jabdyqtardyń arnaıy ekspozıtsııasy boldy. Onda tótenshe jaǵdaılar kezinde qoldanylatyn qytaılyq ozyq tehnıka men apattardyń saldaryn joıýǵa arnalǵan keshendi ınjenerlik sheshimder tanystyryldy.
Ekspozıtsııanyń negizgi jańalyǵy — Qytaıda shyǵarylǵan sanıtarlyq avıatsııa ushaq. Onyń tanystyrylymy Qazaqstan men Qytaı arasyndaǵy saýda-ekonomıkalyq yntymaqtastyqtyń dástúrli taýar aınalymynan joǵary tehnologııalar men ınnovatsııalyq ónimderge qaraı bet burǵanyn kórsetti.
Qazir eki el arasyndaǵy seriktestik joǵary tehnologııalar, medıtsınalyq tehnıka, tótenshe jaǵdaılardyń aldyn alý jáne olardy joıýǵa arnalǵan sheshimder sııaqty qosylǵan quny joǵary salalardy damytýǵa basymdyq berip keledi.
B2B formatyndaǵy kezdesýler aıasynda Qazaqstan men Qytaıdyń 130-dan astam jetekshi kásiporny ózara kelissóz júrgizdi. Kezdesýlerde turmystyq medıtsınalyq tehnıka, jańartylatyn energııa kózderine negizdelgen energııa saqtaý júıeleri, «aqyldy úı» tehnologııalary, smart-gadjetter jáne ıntellektýaldy qoıma júıeleri sııaqty ınnovatsııalyq baǵyttar boıynsha yntymaqtastyq múmkindikteri talqylandy.
Jyl saıyn dástúrli túrde uıymdastyrylatyn bul kórme Qazaqstan men Qytaı arasyndaǵy saýda-ekonomıkalyq baılanystardy jańa deńgeıge kóterýge, ınvestıtsııalyq yntymaqtastyqty keńeıtýge jáne birlesken jobalardy júzege asyrýǵa jol ashatyn mańyzdy alańǵa aınalyp otyr.
