Almatyda ákesinen zorlyq kórgenin aıtqan bloger qyz 10 táýlikke qamaldy
ALMATY. KAZINFORM — Almatyda áleýmettik jelide ákesinen zorlyq-zombylyq kórgenin málimdegen bloger qyz ákimshilik jaýapkershilikke tartyldy.
Almaty polıtsııasynyń málimetinshe, áleýmettik jelilerge júrgizilgen monıtorıng kezinde blogerdiń ákesi tarapynan ózine qatysty zorlyq-zombylyq jasalǵany týraly aıtqan, sondaı-aq bylapyt sózder qoldanyp, qoǵamdyq tártipti buzatyn áreketter kórsetilgen vıdeolary anyqtalǵan.
Bul málimdemeler boıynsha tekserý júrgizilip, kontent avtory men onyń ata-anasynan jaýap alynǵan. Tekserý nátıjesinde bul áreketter týraly aqparat rastalmaǵan. Sonymen qatar vıdeo qyzdyń tyıym salynǵan zattardy qoldanǵany baıqalǵan. Medıtsınalyq kýálandyrý onyń esirtki zattaryn paıdalanǵanyn rastady.
Polıtsııa blogerdiń áreketterinen usaq buzaqylyq jasaý jáne jalǵan aqparat taratý belgilerin anyqtap, jınalǵan materıaldardy sotqa joldaǵan.
Vedomstvonyń habarlaýynsha, buǵan deıin de polıtsııa qyzmetkerleri blogermen profılaktıkalyq áńgime júrgizip, quqyqqa qaıshy minez-qulyqqa jol bermeý jóninde resmı eskertý tapsyrǵan.
— Sot sheshimimen quqyq buzýshyǵa 10 táýlik ákimshilik qamaýǵa alý jazasy taǵaıyndaldy. Budan bólek, jalǵan aqparat taratqany jáne resmı eskertýdiń talaptaryn buzǵany úshin oǵan 25 aılyq eseptik kórsetkish kóleminde aıyppul salyndy, — delingen habarlamada.
Polıtsııa málimetinshe, bloger buǵan deıin de arnaıy qyzmetterdi kórineý jalǵan shaqyrǵany jáne usaq buzaqylyq jasaǵany úshin jaýapkershilikke tartylǵan.
Quqyq qorǵaý organdary jalǵan aqparat taratý, qoǵamdyq tártipti buzý jáne ózge de zańǵa qaıshy áreketter Qazaqstan zańnamasyna sáıkes jaýapkershilikke ákeletinin eskertti.
Eske salaıyq, buǵan deıin bloger Qaısar Qamza Vetnamda qamaýda otyrǵanyn jazǵanbyz.
