Almatyda AITV-men kúrestegi jańa tásilder usynyldy
ASTANA. KAZINFORM — Almaty qalasynda Qazaq dermatologııa jáne ınfektsııalyq aýrýlar ǵylymı ortalyǵy men Jahandyq qor birlesip uıymdastyrǵan «Ómir úshin birlik» atty dıalog alańynda sarapshylar AITV ınfektsııasynyń profılaktıkasy, dıagnostıkalaý jáne emdeý sharalaryn, sondaı-aq qyzmetterge qoljetimdilikti keńeıtý máselelerin talqylady. Bul týraly Densaýlyq saqtaý mınıstrligi málim etti.
— Tek ashyq dıalog pen resýrstardy biriktirý arqyly ǵana biz AITV ınfektsııasynyń taralýyna tıimdi qarsy turyp, patsıentterdiń ómir sapasyn jaqsarta alamyz. Búginde elde ıÝNEIDS-tiń «95–95–95» strategııasynyń kórsetkishteri: AITV-men ómir súretin adamdardyń 87%-y óz mártebesin biledi, olardyń 89%-y antıretrovırýstyq terapııa alady, al em qabyldap júrgenderdiń 92%-ynda vırýstyq júkteme basylǵan, — dep atap ótti QDIAǴO dırektory Roza Qýanyshbekova.
Talqylaý barysynda testileýdi keńeıtý, úzdiksiz terapııamen qamtamasyz etý, emge beıildilikti arttyrý jáne stıgmany tómendetý máselelerine erekshe nazar aýdaryldy. Epıdemıologııalyq jaǵdaıdy turaqtandyrý úshin kúsh-jigerdi biriktirý qajettigi atap ótildi.
Dıalog alańy barlyq múddeli taraptardyń arasyndaǵy is-qımyldy úılestirýge, tájirıbe almasýǵa jáne áriptestikti damytýǵa múmkindik beretin tıimdi platformaǵa aınaldy.
Eske sala keteıik, buǵan deıin Shymkentte 2 myńǵa jýyq adam AITV ınfektsııasyn juqtyrǵany habarlandy.