Almatyda Ahýaldyq jáne Daǵdarys ortalyqtaryna qansha stýdent júgindi
ALMATY. KAZINFORM – Almatyda elimizdegi úzdik joǵary oqý oryndary shoǵyrlanǵan. Sondyqtan megapolıske jyl saıyn bilim izdep keletin stýdentterdiń sany artyp keledi.
Biraq tálimgerler sany artqan saıyn olardy ornalastyrý máselesi de ýshyǵyp keledi. Máselen, bıyl Úkimet otyrysynda Ǵylym jáne joǵary bilim mınıstri Saıasat Nurbek Almaty qalasynan basqa óńirde jataqhana tapshylyǵy joq ekenin aıtty.
Ásirese, oqý jyly bastalarda jataqhanada oryn jetispegendikten, hostel, jalǵa beretin páter aralap ketetin jastar kóbeıedi. Tipti buryn stýdentterdiń dalada qonyp júrgen derekteri de tirkelgen.
Mundaı jaǵdaıdyń aldyn alý úshin bıyl tamyz aıynda Almatyda stýdentterge jataqhana tabýǵa kómektesetin Ahýaldyq ortalyq ashyldy. Keıinirek stýdentterge psıhologııalyq jáne áleýmettik qoldaý kórsetilip, ýaqytsha baspana beriletin Daǵdarys ortalyǵy esigin ashty.
Qazir jańa oqý jyly bastalǵanyna 1 aıǵa jýyq ýaqyt ótti. Osy oraıda, Ǵylym jáne joǵary bilim mınıstrligine saýal joldap, atalǵan ortalyqtardan qansha tálimger kómek alǵanyn anyqtadyq.
Ahýaldyq ortalyq
Vedomstvonyń Joǵary jáne joǵary oqý ornynan keıingi bilim komıteti tóraǵanyń orynbasary Aqerke Abylaıhannyń jaýabyna sáıkes, Almaty qalasyndaǵy Ahýaldyq ortalyq Qazaq ulttyq pedagogıkalyq qyzdar ýnıversıtetiniń bazasynda 2025 jylǵy 1 tamyz - 15 qyrkúıek aralyǵynda táýlik boıy jumys istedi.
- Ortalyqtyń negizgi maqsaty – joǵary oqý oryndarynyń jataqhanalaryna qatysty aqparat berý jáne kómek kórsetý. Osy ýaqyt aralyǵynda Ahýaldyq ortalyqqa 2 500 adam habarlasqan. Kóptegen ótinishter Almaty qalasynyń joǵary oqý oryndaryna, sondaı-aq basqa óńirlerdiń ýnıversıtterine qatysty (Astana, Aqtóbe jáne Qaraǵandy q.) túsken. Barlyq túsken ótinishter boıynsha ombýdsmendermen, joǵary oqý oryndarynyńbasshylarymen birge jumystar júrgizilip, ótinishterdi jedel qarastyrylyp, týyndaǵan barlyq másele jedel túrde sheshildi, - dedi ol.
Daǵdarys ortalyǵy
Odan bólek Aqerke Abylaıhan Daǵdarys ortalyǵy M.Tynyshbaev atyndaǵy ALT ýnıversıtetiniń Masanchı kóshesi, 88 mekenjaıynda ornalasqan №4 Stýdentter úıinde ashylǵan jáne ortalyq 13 tamyz ben 3 qyrkúıek aralyǵynda jumys júrgizgenin atap ótti.
- Kórsetilgen ýaqyt aralyǵynda Daǵdarys ortalyǵyna 19 stýdent júgindi, - dep naqtylady komıtet tóraǵasynyń orynbasary.
Sondaı-aq ol Daǵdarys ortalyǵynyń basty mindetteri stýdentterge ýaqytsha turǵyn úımen kómek kórsetý, áleýmettik-turmystyq nemese psıhologııalyq qıyndyqtarǵa tap bolǵan stýdentterge ýaqytsha turý múmkindigin usyný, quqyqtyq jáne aqparattyq keńester, sondaı-aq, áleýmettik baǵdarlamalar jóninde aqparattar berý ekenin túsindirdi.
Aıtýynsha, stýdentter Daǵdarys ortalyǵyna jaldamaly páterden kútpegen ýaqytta shyǵarsa, qarjylyq qıyndyqtarǵa tap bolǵanda, tótenshe jaǵdaılar (órt, sý tasqyny t.b.) saldarynan baspanasyz qalǵan jaǵdaıda júgine alady.
- Daǵdarys ortalyǵyna joǵary oqý oryndarynyń áleýmettik bólim nemese stýdenttik dekanat arqyly, tikeleı Daǵdarys ortalyǵyna baryp ótinish berý, Call-ortalyq nemese onlaın portal (eger bar bolsa) arqyly ótinish qaldyrý, jergilikti ákimdik nemese jastar isi jónindegi bólim arqyly habarlasa alady. Sonymen qatar Daǵdarys ortalyǵynda bilim alýshy máselesi sheshilgenge deıin tura alady, - dedi ol.
Megapolıstegi jataqhana máselesi
Ǵylym jáne joǵary bilim mınıstrliginiń málimetinshe, búgingi kúni Almaty qalasynda 162 jataqhana bar, onyń ishinde: 86-sy (32 582 tósek-oryn) joǵary oqý oryndarynyń óz teńgeriminde, jalǵa alynǵan - 31 (8 066 tósek-oryn), hostel - 41 (3 693 tósek-oryn), qonaqúı - 1 (406 tósek-oryn).
Al 1 qyrkúıektegi jaǵdaı boıynsha Almaty qalasynyń joǵary oqý oryndarynda jataqhanaǵa tapshylyǵy - 6 860 oryn.
- 2025 jylǵa arnalǵan jospar respýblıka boıynsha 10 276 oryndy quraıtyn 29 jataqhanany iske qosýdy kózdeıdi. Onyń ishinde: JOO úshin Almaty qalasynda 2 356 oryndyq 11 jataqhana. Birinshi jartyjyldyqtyń qorytyndysy boıynsha joǵary oqý oryndarynyń stýdentteri úshin 3 180 oryndyq 4 jataqhana (Astana qalasynda 2 jataqhana, Almaty qalasynda 2 jataqhana) paıdalanýǵa berildi, - dep habarlady mınıstrlikten.
Sondaı-aq vedomstvo málimetine sáıkes, Almaty qalasynda Q.Sátbaev atyndaǵy Qazaq ulttyq tehnıkalyq zertteý ýnıversıteti 5,9 myń oryndyq 5 jataqhana salýdy, Ál-Farabı atyndaǵy Qazaq ulttyq ýnıversıteti 5,2 myń oryndyq jataqhana salýdy josparlap otyr.
- Qazirgi ýaqytta mınıstrlik Azııa Damý Bankiniń tehnıkalyq kómegin tarta otyryp, pılottyq jobany iske asyrýǵa daıyndyq júrgizip jatyr. Áleýmettik saladaǵy memlekettik-jekeshelik áriptestikti damytýdyń 2024-2028 jyldarǵa arnalǵan keshendi josparyna sáıkes, osy obektilerdi salý merzimi – 2026-2027 jyldar bolyp bekitildi, - delingen vedomstvo jaýabynda.
Eske salaıyq, Halyqaralyq bilim berý korporatsııasynda stýdenttik jataqhana ashyldy.