Almatyda aǵash qoımasy órtendi
ALMATY. KAZINFORM — Almatyda aǵash saqtaıtyn iri qoıma órtendi. Der kezinde óshirilgen jalyn úlken aýmaqqa taralyp úlgermedi. Zardap shekkender de joq.
Almaty qalalyq Tótenshe jaǵdaılar departamentiniń málimetinshe, 18 qarasha kúni saǵat 16:14–te Áýezov aýdany Tsvetochnaıa kóshesi, 1/10 mekenjaıynda qoımada órt shyqqany jaıly habar túsken.
Órt sóndirýshiler oqıǵa ornyna jetken sátte qoımanyń ashyq jalynmen órtengeni belgili bolǵan.
«140 sharshy metr alańdy sharpyǵan ónerkásiptik baza aýmaǵynda shatyr astyndaǵy 2 deńgeıli konteınerlerdegi jınalǵan aǵashtyń ashyq jalynmen janyp jatqany anyqtaldy. Órt júktemesiniń joǵary bolýyna baılanysty qyzyl jalyn qas qaǵym sátte aǵashqa taralý qaýpi týyndady, alaıda qabyldanǵan jedel sharalarmen qaýip qysqa merzimde joıyldy. Órt jarty saǵattyń ishinde oqshaýlandy. Aldyn ala aqparat boıynsha birneshe ıesi bar nysannyń jalpy aýdany 3 myń sharshy metrden asady», — dep habarlady vedomstvodan.
Osyǵan deıin «Almaty-Bishkek» avtojolynyń 18 shaqyrymynda ornalasqan jıhaz tsehynda órt shyǵyp, 2 adam jeńil jaraqat alǵany týraly jazǵan edik.
