Almatyda «ádemi» nómirge bir aptada 19 myń ótinish túsken
ALMATY. KAZINFORM — Bıyl 5 qańtardan bastap elimizde óz kóligine memlekettik tirkeý nómirin tańdaý qyzmeti ashyldy.
Almaty qalasy polıtsııa departamentiniń Ákimshilik polıtsııa basqarmasynyń bastyǵy Serik Shýmaevtiń aıtýynsha, bir apta ishinde almatylyqtar 19100 jańa nómirge ótinish jibergen. Ol nómirdi tańdaý múmkindigin engizý osy jumysty ashyq etip, memlekettik qyzmetterdi tsıfrlandyrýdy kózdeıtin aýqymdy baǵdarlamanyń bir bóligi ekenin atap ótti.
— Memlekettik nómirlerdiń birneshe sanaty qarastyrylǵan. Olardyń quny 10-nan 280 aılyq eseptik kórsetkishke (AEK) deıin barady. Baǵa avtokólik ıesi tańdaǵan sandyq nemese áriptik kombınatsııaǵa baılanysty. Memlekettik nómirlerdi satyp alýdan túsken qarajat qala bıýdjetine túsedi. Qazir birdeı úsh sannan turatyn, basynda nemese sońynda nólderi bar nómirlerge suranys ótie joǵary, — dedi Serik Shýmaev.
Qazirgi ýaqytta nómir tańdaý úshin ótinish mamandandyrylǵan halyqqa qyzmet kórsetý ortalyqtary arqyly beriledi. Degenmen, aldaǵy ýaqytta bul qyzmet onlaın formatta — elektrondyq úkimet portaly men mobıldi qosymshalar arqyly qoljetimdi bolmaq.
— Áriptik jáne sandyq kombınatsııalar jalpy qabyldanǵan moraldyq normalarǵa saı bolýy tıis. Biz muny aldyn ala eskertemiz, ıaǵnı balaǵat sózder nemese bireýdiń ar-namysy men qadir-qasıetine nuqsan keltiretin jazýy bar nómirler bolmaıdy. Barlyǵy ádepten aspaýy kerek, — dedi polıtsııa departamentiniń resmı ókili Saltanat Ázirbek.
Eske salaıyq, Abaı oblysynyń 700-den asa turǵyny jeke avtokólik nómirin erkin tańdady.