Almatyda adamdardyń ómirin qıǵan jol apaty megapolısterdegi problemalardy kórsetti - senator
QR Parlamenti Senatynyń depýtaty Bıbigúl Jeksenbaı megapolısterdegi problemalardy júıeli túrde sheshýdi usyndy. Bul rette ol Úkimet basshysy Álıhan Smaıylovtyń atyna depýtattyq saýal joldady, dep habarlaıdy Kazinform.
«Elimizde jyl saıyn jol apatynan eki myńǵa jýyq qazaqstandyq ajal qushyp otyr. Onyń ishinde keıingi bes jylda 1,1 myńnan asa jasóspirim qaıtys bolǵan. 2023 jyldyń 10 aıynda 11 618 jol-kólik oqıǵasy tirkelgen. Ótken jumada Almaty qalasynda úsh adam ómirin qıǵan jol-kólik oqıǵasy elimizdiń megapolısterindegi sheshilmeı kele jatqan birqatar ótkir máseleni kórsetti. Qoǵamdyq kólikterde qaýipsizdik máselesi qarastyrylmaǵan, aıaldamalardyń kóbisi kólik jolyna tym jaqyn ornalasqan. Eńbek resýrstaryn damytý ortalyǵynynyń málimeti boıynsha 2030 jylǵa qaraı halyq sany Astanada – 33 paıyzǵa, ıaǵnı 1,7 mln adamǵa deıin, Almatyda – 20 paıyzǵa (2 mln 466 myń adamǵa deıin), Shymkentte – 32 paıyzǵa (1,5 mln-ǵa deıin) ósedi. Bul el halqynyń tórtten birine jýyǵy osy megapolısterde shoǵyrlanady degen sóz», - dedi B. Jeksenbaı Senattyń jalpy otyrysynda.
Onyń aıtýynsha, qazirdiń ózinde atalmysh qalalardaǵy halyqtyń edáýir bóligi shet aımaqtarda, jeke sektormen qosylǵan aýdandarda turady. Munda mektepter men balabaqshalarda oryn tapshylyǵy joǵary. Adamdar balalaryn mektepke jetkizý úshin biraz jerge jeke kólikpen barýǵa májbúr. Sondyqtan bul qalalardaǵy ózge máselelermen qatar, qoǵamdyq kólik tapshylyǵy men jol keptelisteri úlken problemaǵa aınaldy.
«Ulttyq statıstıka bıýrosynyń málimeti boıynsha 2023 jylǵy 1 qarashadaǵy jaǵdaı boıynsha Qazaqstanda tirkelgen kólik sany 5 mln 216,1 myń. Onyń ishinde 88% jeńil avtomobıl, 9,9% júk kóligi jáne tek 2,1 paıyzy avtobýs. Jeńil avtokólikter sany kún saıyn eselep kóbeıip jatyr. Mamandardyń esebine qaraǵanda kez-kelgen elde keptelisten zardap shegetinder – kólik júrgizýshileri. Olar jylyna jol keptelisterine 360 saǵat nemese 45 jumys kúnine deıin qurtady eken. Onymen qosa, kepteliste jıi, ári uzaq turý janarmaı shyǵyny ǵana emes, bólinetin ýly gazdan ókpe aýrýlarynyń týyndaýyna ákelip soǵady. Qazaqstandyq avtokólikterdiń 82,1 paıyzy benzınmen júredi. Sondyqtan megapolısterdegi qazirgi jol keptelisteri qatardaǵy jergilikti máseleler deńgeıinen shyǵyp ketti», - dedi depýtat.
Bul rette senator birqatar usynysyn jarııalady:
— Halqy jyldam ósip jatqan qalalardyń ortalyqtary men shetkeri aımaqtary boıynsha úılestirý jáne saýda-qyzmet, demalys oryndaryn birkelki ornalastyrýdy qatań baqylaý
— Qala qozǵalysyn basqarýdyń biryńǵaı ortalyqtan avtomatty basqarý jáne «aqyldy» baǵdarshamdar júıesin engizý
— Marshrýttardyń, qoǵamdyq kólik bólimsheleriniń sanyn kóbeıtý, olarǵa arnaıy jolaqtardy bólý jáne qoǵamdyq kólik sapasy men qaýipsizdigin kúsheıtý
— Avtoparkterdiń kómegimen qyzmet kórsetýdiń joǵary deńgeıli standarttaryn belgileý
— Tranzıttik aǵyndy qalanyń ishki kólik aǵynynan ajyratý úshin joldardy jeke deńgeıde salý
— Kólik keptelisi problemalaryn sheshýde jol qozǵalysyn retteý jónindegi jergilikti ýákiletti organnyń róli jáne jeke kompanııalardyń jaýapkershiligin kúsheıtý.
