Almatyda Forum oıyn-saýyq ortalyǵynan adamdar evakýatsııalandy
ALMATY. KAZINFORM — Polıtsııaǵa jarylǵysh zat týraly anonımdi qońyraý túsken.
Almaty qalasy Polıtsııa departamentiniń málimetinshe, qazirgi ýaqytta ǵımaratta tekserý júrgizilip jatyr. Forum oıyn-saýyq ortalyǵyna polıtsııa qyzmetkerleri, saperler jáne tótenshe jaǵdaılar qyzmetkerleri jetken.
— Azamattardan sabyr saqtap, dúrbeleńge túspeýin suraımyz. Tekserý qorytyndysy boıynsha kózdelgen sharalar qabyldanatyn bolady. Esterińizge sala keteıik, terrorızm aktisi týraly kórineý jalǵan habarlaǵany úshin QR QK 273-babyna sáıkes qylmystyq jaýapkershilik qarastyrylǵan, — dep habarlady qalalyq polıtsııa departamentiniń baspasóz qyzmeti.
Eske salaıyq, buǵan deıin Qostanaıda polıtsııaǵa jarylǵysh zat týraly jalǵan habarlama túskenin jazǵanbyz.
