Almatyda adam urlamaq bolǵan kúdiktiler ustaldy
ALMATY. KAZINFORM – Almatyda polıtsııa qyzmetkerleri adam urlaýǵa oqtalǵan kúdiktilerdi ustady.
Polıtsııanyń málimetinshe, beıtanys adamdar bir azamatqa kúsh qoldanyp, ony kólikke otyrǵyzyp, belgisiz baǵytqa alyp ketken. Oqıǵa boıynsha aqparat dereý tirkelip, jedel basqarý ortalyǵy «Ustaý» josparyn engizdi.
Polıtsııa ekıpajdary kólikti dereý anyqtap, toqtatqan. Kólik salonynda jábirlenýshi jáne oqıǵaǵa qatysy bar birneshe er adam bolǵan.
Aldyn ala málimetterge qaraǵanda, kúdiktiler ózin quqyq qorǵaý organdarynyń qyzmetkeri retinde tanystyryp, oıdan shyǵarylǵan sebeptermen azamatqa psıhologııalyq qysym kórsetken. Qazirgi ýaqytta oqıǵanyń barlyq mán-jaıy anyqtalyp jatyr. Kúdikti tulǵalar ýaqytsha ustaý ızolıatoryna qamaldy. Qajetti tergeý amaldary júrgizilip jatyr.
– Bul – asa aýyr qylmys. Kýágerdiń qyraǵylyǵy men polıtsııa qyzmetkerleriniń jedel áreketiniń arqasynda zańsyz áreketterdiń joly kesildi. Azamattardy arandatýshylyqqa berilmeýge jáne kúmán týyndaǵan jaǵdaıda «102» nómirine dereý habarlasýǵa shaqyramyz, - dedi Almaly aýdandyq Polıtsııa basqarmasynyń bastyǵy Maqsat Pshan.
Eske salaıyq, buǵan deıin Pavlodarda adam urlaýmen jáne bopsalaýmen aınalysqan qylmystyq top ustalǵanyn habarlaǵanbyz.