Prezıdent Ábdijámil Nurpeıisovtiń 100 jyldyǵyna oraı quttyqtaý joldady
ALMATY. KAZINFORM – Almaty qalasynyń «Dostyq úıinde» qazaq ádebıetiniń qaıtalanbas sýretkeri, Halyq jazýshysy Ábdijámil Nurpeıisovtyń 100 jyldyǵyna arnalǵan «Álem tanyǵan Ábdijámil» atty halyqaralyq ǵylymı-tájirıbelik konferentsııa ótti. Bul týraly Mádenıet jáne aqparat mınıstrligi málimdedi.
Memleket basshysynyń tapsyrmasy boıynsha QR Mádenıet jáne aqparat mınıstri Aıda Balaeva qatysyp, Prezıdent Qasym-Jomart Toqaevtyń quttyqtaý hatyn oqyp berdi.
«Sóz óneriniń sardary sanaly ǵumyryn ultynyń dúnıetanymyn baıytýǵa arnady. Ádebıet álemine qubylys bolyp engen suńǵyla sýretker qazaq prozasyna erekshe qoltańbasyn qaldyrdy. Kózi tirisinde-aq klassık atanǵan jazýshy qalamgerlerdiń jańa býynyna úlgi-ónege kórsetip, ózindik mektebin qalyptastyrdy. Ábeńniń ár týyndysynan týǵan jerge degen rııasyz súıispenshiligi aıqyn kórinedi. Onyń «Qan men ter», «Sońǵy paryz» sekildi romandaryn óz zamanynyń aınasy deýge bolady. Aral arqyly qazaqtyń, qazaq arqyly barsha adamzattyń máselesin kótergen bul shyǵarmalar – álem órkenıetine qosylǵan qundy qazyna», – delingen quttyqtaý hatta.
Óz sózinde Aıda Balaeva qalamgerdi eske alýǵa arnalǵan is-sharanyń mańyzyn atap ótti.
«Prezıdent atap ótkendeı, Ábdijámil Nurpeıisov – qazaq ádebıetin álemdik deńgeıge kótergen tulǵa. Bul sózimizge onyń shet tilderge aýdarylǵan shyǵarmalary, álem oqyrmandarynyń joǵary baǵasy dálel bola alady. Búgingi konferentsııa jazýshynyń shyǵarmashylyǵyn jańa qyrynan zerdeleýge jol ashady degen úmittemin», – dedi mınıstr.
Sondaı-aq, jazýshynyń júz jyldyq mereıtoıyna oraı elimizdiń barlyq óńirinde irgeli is-sharalar, ádebı keshter uıymdastyrylǵanyn aıtty.
Keıingi úsh aıdyń ózinde óńirlerde 50-ge tarta is-shara ótti. Basylym betterinde qalamgerdiń ómiri men shyǵarmashylyǵy týraly 200-den astam maqala jaryq kórip, telearnalardan «Oryndalmaǵan amanat», «Abyz ǵumyr» atty derekti fılmder jáne túrli sıýjetter kórsetildi. Halyqaralyq ǵylymı-praktıkalyq konferentsııaǵa Qazaqstan Jazýshylar odaǵynyń tóraǵasy Mereke Qulkenov, Halyqaralyq TÚRІKSOI uıymynyń Bas hatshysy Sultan Raev, kórnekti memleket jáne qoǵam qaıratkerleri, aqyn-jazýshylar, mádenıet-óner ókilderi qatysty. Konferentsııa aıasynda Ábdijámil Nurpeıisovtiń turǵan úıine ilingen eskertkish taqtanyń jáne Dostyq úıinde fotokórmeniń ashylýy ótti.
Buǵan deıin Ábdijámil Nurpeıisov jıi keletin Araldaǵy ádebıet úıiniń tynys-tirshiligi týraly jazǵan bolatynbyz.
