Almatyda Abaı, Rysqulov jáne Saın kóshelerin uzartý jumystary qalaı júrip jatyr
ALMATY. KAZINFORM — Abaı dańǵylyn Úlken Almaty aınalma avtomobıl jolyna (ÚAAAJ) deıin uzartý arqyly bıyl kólik qozǵalysyn ashý josparlanyp otyr.
Almaty ákimdiginiń málimetinshe, aldaǵy ýaqytta ÚAAAJ-yna deıin 6 radıaldy magıstral kósheni uzartý josparlanǵan. Onyń ishinde: Abaı jáne Rysqulov dańǵyldary, Saın, Tilendıev, Aqan Seri kósheleri men Soltústik aınalma kóshesi bar.
Qazir Abaı jáne Rysqulov dańǵyldaryn, sondaı-aq Saın kóshesin Úlken Almaty aınalma avtomobıl jolyna deıin uzartý jobalarynyń qurylys daıyndyǵy shamamen 50%-ǵa jetken. Joba aıasynda Aqsaı ózenindegi kópirlerdi, ÚAAAJ men temirjol jelileri arqyly ótetin jol ótkelderi sekildi jasandy ınjenerlik qurylystar salynyp jatyr.
Sonymen qatar jer telimderin satyp alý jumystary jalǵasyp keledi. Abaı dańǵyly boıynsha 82 jer ýchaskesiniń 71-i, Rysqulov dańǵyly boıynsha 190 jer ýchaskesiniń 172-si satyp alynǵan. Al Saın kóshesi boıyndaǵy jer telimderin satyp alý rásimi tolyq aıaqtalǵan.
— Byltyr qala bıýdjeti esebinen oblys aýmaǵyndaǵy jer ýchaskelerin satyp alý jumystaryn aıaqtap, Úlken Almaty aınalma avtomobıl jolyna deıingi joldy óz kúshimizben aıaqtaý týraly sheshim qabyldadyq. Barlyq joba bizdiń qaramaǵymyzǵa berildi. Qazir olarǵa túzetýler engizilip jatqanymen, qurylys jumystary toqtaǵan joq. Qajetti qarjy tolyq qarastyrylǵan, merdiger uıym anyqtalǵan. Sondyqtan bıyldyń ózinde Abaı dańǵyly men Saın kóshesin Úlken Almaty aınalma avtomobıl jolyna deıin uzartý arqyly kólik qozǵalysyn qamtamasyz etýdi tapsyramyn, — dedi Almaty ákimi Darhan Satybaldy.
Eske salaıyq, buǵan deıin Almatyda Tilendıev kóshesin uzartýǵa alynatyn jer telimderiniń tizimi ulǵaıǵanyn jazǵanbyz.
