Almatyda Abaı men Markov kóshesi eki aıǵa jabylady

ALMATY. KAZINFORM – Almatynyń eki aýdanynda tozy jetken qubyrlar qaıta jańǵyrtylady. 

— 3 shilde men 25 tamyz aralyǵynda Almatynyń Bostandyq aýdanynda Markov kóshesiniń boıymen — Buqar Jyraý býlvarynan «Zaıka» balabaqshasyna deıingi bóliginde avtokólik qozǵalysy eki baǵytta da toqtatylady. 1973 jyly paıdalanýǵa berilgen 1,5 shaqyrymǵa jýyq jylý trassasy aýystyrylady. Kórshiles turǵyn úılerdiń aýlalaryna avtokólik pen jedel qyzmetter Rımskıı-Korsakov kóshesi arqyly — Buqar Jyraý býlvarynan № 3 turǵyn úı jaqtaǵy kireberiske deıin qatynaı alady, — dep habarlady ákimdikten.

Shekteýler atalǵan kóshelerde joldyń astynan ótetin magıstraldyq qubyrlardy qaıta jańartý jumystarynyń qaýipsizdigin qamtamasyz etý maqsatynda engiziledi.

— Jańǵyrtý jumystary júrgizilip jatqan kezeńde tutynýshylarǵa ystyq sý berý toqtatylmaıdy. Atalǵan jylý trassasy 16 kóppáterli turǵyn úı men taǵy 7 nysandy jylýmen jáne ystyq sýmen qamtamasyz etedi, — dep atap ótti ákimdikten.

Sondaı-aq Mamyr-4 shaǵynaýdanynda sý qubyry jáne káriz jelilerin tartý jumystaryna baılanysty 2 shilde men 15 tamyz aralyǵynda Abaı dańǵylynda ishinara qozǵalys shekteledi.

— Abaı dańǵylynyń shyǵys baǵytyndaǵy jolaqtarynyń biri — Momyshuly kóshesinen Saın kóshesine deıingi aralyq ýaqytsha jabylady, — delingen habarlamada.

Jalpy, bıyl qala boıynsha 39 shaqyrym jylý jelisin qaıta jańartý josparlanǵan. Bul jelilerdiń tozý deńgeıin 54%-ǵa deıin tómendetýge múmkindik beredi.